«Վրաստանի խորհրդարանը կարող է դառնալ միակուսակցական»․ Կոբախիձե

Վրաստանի վարչապետ Իրակլի Կոբախիձեն հայտարարել է, որ հոկտեմբերին կայանալիք խորհրդարանական ընտրություններում իշխող «Վրացական երազանք» կուսակցության կողմից սահմանադրական մեծամասնություն ստանալու դեպքում դատական գործընթաց կսկսվի նախկին նախագահ Միխայիլ Սաակաշվիլիի «Միասնական ազգային շարժում» կուսակցության արգելքի վերաբերյալ, և, ինքնաբերաբար կառաջանա այդ կուսակցության պատգամավորական մանդատները չեղարկելու հարցը։

«Խորհրդարանը կմնա ժողովրդավար, որտեղ իշխող կուսակցությունը կընտրվի սահմանադրական մեծամասնության կողմից։ Մոլդովայի խորհրդարանն այսօր գրեթե միակուսակցական է, բայց ոչ ոք այդ մասին չի խոսում, նրան միայն ողջունում են։ Նույնը տեղի կունենա նաև Վրաստանում։ «Միասնական ազգային շարժման» արգելքը շատ կարևոր պայման է, որպեսզի Վրաստանն անարգել շարունակի շարժվել դեպի Եվրոմիություն»,- ասել է Կոբախիձեն։