Զելենսկին խոստացել է պատասխանել Ռուսաստանի զանգվածային հարվածներին

Ուկրաինայի նախագահ Վլադիմիր Զելենսկին խոստացել է, որ Կիևը կպատասխանի Ռուսաստանի կողմից երկրի տարբեր շրջանների զանգվածային գնդակոծություններին:

Թելեգրամյան ալիքում Զելենսկին հայտնել է, որ գիշերը Ռուսաստանի կողմից հարձակման ենթարկված շրջաններում դեռևս փրկարարական աշխատանքներ են իրականացվում արկերի և բեկորների ընկնելու վայրերում:

Նա հայտնել է, որ զոհերի թիվը հասել է 4-ի, վիրավորվել է 16 մարդ:

«Մենք անպայման կպատասխանենք Ռուսաստանի այս և այլ հարձակումներին։ Մարդկության դեմ հանցագործությունները չեն կարող անպատիժ մնալ»,- ասել է Զելենսկին։

Նա հավելել է, որ ընդհանուր առմամբ ռուսական ուժերն արձակել են ավելի քան 90 օդային թիրախներ Ուկրաինայի քաղաքացիական բնակչության և ենթակառուցվածքների ուղղությամբ, այդ թվում՝ 81 անօդաչու թռչող սարք, ինչպես նաև թևավոր, բալիստիկ և աերոբալիստիկ հրթիռներ: