«Հանրային ռադիոն պետք է լինի չեզոք և անկախ, չպետք է գովաբանի իշխանությանը»․ Արմեն Քոլոյան

«Ինձ համար կարմիր գիծ է, որ Հանրային ռադիոն պետք է լինի մաքսիմալ չեզոք, անաչառ, անկախ։ Այն չպետք է գովաբանի իշխանությանը, չպետք է գովաբանի ընդդիմությանը։ Պետք է լինի նեյտրալ և չեզոք, ինչպես «Ազատությունն» էր»,- ԱԺ-ում լրագրողների հետ զրույցում ասաց Հանրային ռադիոյի տնօրեն Արմեն Քոլոյանը։ Հարցին՝ «Դուք կաշկանդված չե՞ք, օրինակ, Նիկոլ Փաշինյանի ջերմ վերաբերմունքով», պատասխանեց․ «Ես Նիկոլ Փաշինյանին մեկ անգամ եմ տեսել»։
Անդրադառնալով հարցին, թե իր ընտրությունից մեկ օր առաջ մի շարք պաշտոնյաների հետ հանդիպումները նպաստե՞լ են մրցույթի արդյունքների վրա, Քոլոյանը պատասխանեց․ «Ես այս քաղաքում որտեղ և ում հետ ուզենամ կարող եմ հանդիպել։ Ես այդ նույն օրերին պաշտոնյաների հետ զբոսնել եմ, ինչ որ կաֆեներում նստել, զրուցել եմ, լավ եմ արել, դա իմ մասնավոր հանդիպումներն են, իմ անձնական գործն է»։