««ARMSAT-1» արբանյակի 8 միլիոն դոլարանոց ձախողված նախագիծը վերածվել է կոռուպցիոն սկանդալի». Հենրիխ Դանիելյան

248

Ուրբաթ, 08 նոյեմբերի, 2024 թ., 18:36

ՀՀԿ երիտասարդական կազմակերպության ղեկավար Հենրիխ Դանիելյանի ֆեյսբուքյան գրառումը. «Հայաստանի կոռումպացված և խաբեբա իշխանությունն ազգային ռեսուրսների մսխման վառ օրինակ է:

Հայաստանում վերջին տարիներին պետական միջոցների սխալ և կասկածելի կառավարումը դարձել է մռայլ առօրյա, և դրա վերջին վառ օրինակներից է տիեզերք ուղարկված հայկական «ARMSAT-1» արբանյակի ձախողված ծրագիրը։ Այս նախագիծը, որի արժեքը հասել է մոտ 8 միլիոն դոլարի, վերածվել է հերթական կոռուպցիոն սկանդալի, ինչն այսօր քննվում է Հակակոռուպցիոն կոմիտեում։ Այս դեպքը նոր վկայություն է Հայաստանի կոռումպացված և խաբեբա իշխանության անարդյունավետ և ոչ թափանցիկ գործելաոճի մասին։

Հայաստանի այսօրվա կառավարիչները բազմիցս հայտարարել են զարգացումներին և նորարարական ծրագրերին նվիրվածության մասին, սակայն գործնականում այս խոստումները երբեք իրականություն չեն դառնում։ Տիեզերքում հայկական ներկայությունը մեծ խանդավառություն առաջացրեց, սակայն արբանյակի կարճաժամկետ աշխատանքը և ծրագրված արդյունքների բացակայությունը լուրջ կասկածներ է առաջացրել՝ այն դարձնելով հերթական չիրականացված երազանք։ Տարեցտարի ժողովուրդը լսում է մեծ խոստումներ, բայց փոխարենը ստանում է խաբեության կառույցի նոր, ավելի ու ավելի վառ օրինակներ։

Այս ծրագրի ձախողումը ոչ միայն տեխնիկական խնդիր է, այլև ցուցադրանք է՝ թե ինչպես է կոռումպացված և խաբեբա իշխանությունը մսխում ազգային ռեսուրսները։ Արբանյակի նախագծման, կառավարման և գործարկման ընթացքում վատնված միլիոնավոր դոլարները ուղղակիորեն բեռն են դառնում հարկատուների վրա, որոնց միջոցներն օգտագործվում են անարդյունավետ նախագծերի վրա՝ թափանցիկության և հաշվետվողականության բացակայությամբ։

Իշխանափոխությունից հետո Հակակոռուպցիոն մարմինները պետք է ամբողջովին բացահայտեն այս և նմանատիպ այլ դեպքերը և պատժեն բոլոր նրանց, ովքեր Հայաստանի ժողովրդի գրպանն են մտել, իսկ հիմա հասարակությունը պետք է պահանջի հստակ հաշվետվողականություն իր հարկերով ստեղծված պետական միջոցների օգտագործման վերաբերյալ։ Հայաստանը կկարողանա հաջողությամբ զարգանալ և բարելավել իր քաղաքացիների կյանքը միայն այն ժամանակ, երբ ազատվենք այս կոռումպացված, գող ու թալանչի խաբեբա իշխանության ճիրաններից։

Աղբյուրը` Հենրիխ Դանիելյան