«Առավել ուշադրության է արժանի այն, ինչ հայտարարվեց «երկու բառով»»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Գործնականում, Վաշինգթոնում տեղի ունեցածի առնչությամբ առավել ուշադրության է արժանի ոչ թե այն, ինչ ստորագրվել է՝ իր աղմկոտ անտուրաժով, այլ այն, ինչ հայտարարվեց «երկու բառով»:

Իսկ «երկու բառով» հայտարարվեցին երկու էական բաներ:

Նախ, ինչպես անդրադարձել եմ, այն, որ Հայաստանը միանում է ԻԼԻՊ դեմ պայքարի Գլոբալ կոալիցիային, որ գլխավորում է ԱՄՆ: Մյուսն այն, որ առաջիկայում Հայաստան կժամանի ԱՄՆ մաքսային ու սահմանային պարեկների աշխատանքային խումբ, որի նպատակն է օգնել Հայաստանին սահմաննային անվտանգության կարողությունը բարձրացնելու համար:

Նախ, ինքնին ոչ միայն վատ բան չկա, այլ ողջունելի է Հայաստանի սահմանային անվտանգության կարողունակության բարձրացման համար օգտակար ցանկացած գործընկերություն թե ԱՄՆ, թե որևէ այլ երկրի հետ: Սա անխոս:

Բայց, մենք նաև հասկանում ենք, որ գործ ունենք մեծ քաղաքականության հետ, այդ քաղաքականության մեծ դերակատարներից մեկի հետ, հետևաբար մեղմ ասած միամիտ է մտածել, թե այդօրինակ նախաձեռնությունները բուն իմաստով հենց այն մասին են, ինչի մասին հայտարարվում են:

Հետևաբար, տեղին է հարցը, թե բուն առումով ինչի՞ մասին է ԱՄՆ մաքսային ու սահմանային պարեկների խմբի այցը այս շրջափուլում: Արդյո՞ք այն «Միջին միջանցքի», որի մասին դեռևս 2024 թվականի ամռանը Երևանում հայտարարեց Էնթոնի Բլինքենի տեղակալ Ջեյմս Օ Բրայանը, որ ԱՄՆ համար առաջնահերթ է կառուցել Կենտրոնական Ասիայից դեպի Միջերկրական ծով առեւտրային միջանցք, և հատկապես Ադրբեջան-Հայաստան-Թուրքիա երթուղով:

Եվ մյուսը: Հոկտեմբերին Փաշինյան-Պուտին հանդիպմանը ձեռք բերվեց համաձայնություն, որ Իրանի հետ Հայաստանի սահմանի անձնագրային անցակետը ամբողջությամբ կանցնի Հայաստանի սահմանապահ ծառայությանը և ռուս սահմանապահները այլեւս ծառայություն չեն իրականացնի այդ անցակետում: Նախորդ տարի դեկտեմբերից այդ համաձայնությունը մտավ ուժի մեջ: Արդյո՞ք ամերիկյան մաքսային ու սահմանային պարեկների խմբի այցի «թիրախում» նաև այդ անցակետն է:

Եվ արդյո՞ք դրա վերաբերյալ հայ-ամերիկյան քննարկումների մասին իրազեկվածության պատճառով էր, որ Իրանի պաշտոնյաները պարբերաբար հայտարարում են, որ հասկանալով Հայաստանի համար հայ-ամերիկյան հարաբերության կարևորությունը, այդուհանդերձ դեմ են ռեգիոնում ԱՄՆ ներկայությանը:

Ընդ որում, այդ առումով էլ ուշագրավ է, որ օրերս Հայաստանում էր Իրանի անվտանգության խորհրդի քարտուղար Ահմադիանը, որին Երևանը հավաստիացնում էր հայ-իրանական «բնական շահերի» անսասանությունը»: