««Միջանցք» կոչվածը Հայաստանի դեմ ապագա ագրեսիայի պլացդարմ է». Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը. ««Չպետք է մոռանալ, որ այն տարածքները, որտեղ ներկայումս գտնվում է Հայաստանը, պատմական ադրբեջանական հողեր են։ Հայաստանը հանրապետություն է, որը փաստացի ստեղծվել է Ադրբեջանի հողերի վրա... Արևմտյան ադրբեջանցիների իրավունքն է ապրել այն տարածքներում, որտեղ նրանք ծնվել, մեծացել են և որտեղ ապրել են իրենց նախնիները։ Գոնե նրանք պետք է կարողանան հարմարավետ այցելել այդ տարածքներ։ Զանգեզուրի միջանցքի բացումը պետք է դիտարկել որպես արևմտյան ադրբեջանցիների իրավունքների վերականգնման առաջին քայլերից մեկը»,- սա հատված է Ադրբեջանի իշխող «Յենի Ազերբայջան» կուսակցության անդամ, պատգամավոր Նագիֆ Համզաևի հարցազրույցից։
Պետական մակարդակով ՀՀ տարածքը կոչում են «Արևմտյան Ադրբեջան» ամեն օր, իրենց վերագրում գոյություն չունեցող «իրավունքներ», ամեն ժամ այդ անհեթեթ ու վտանգավոր քարոզն է, ինչը ոչ միայն չի ընկալվում ՀՀ քաղաքական ղեկավարության կողմից, այլև ինչ-որ տեղ խրախուսվում է, երբ ՀՀ իշխանությունները միակողմանիորեն հրաժարվում են մեր կենսական իրավունքներից՝ դիմացը ստանալով նոր ագրեսիվ նկրտումներ։
Իսկ այս մեջբերումն արեցի, որպեսզի երկարաժամկետ առումով ևս հասկանալի լինի, թե Բաքվի ինչին է պետք «միջանցք» կոչվածը, դա Հայաստանի դեմ ապագա ագրեսիայի պլացդարմ է, որի մասին արդեն բացահայտ տեքստով խոսում են․․․»: