80 ընտանիք փողոցում է հայտնվելու․ «Հրապարակ»

«Հրապարակ»-ը գրում է․ «44-օրյա պատերազմի հետևանքով զոհված ու անհայտ բացակայող ճանաչված արցախցիների ընտանիքները կանգնած են հայաստանյան իրենց բնակարանները կորցնելու վտանգի առջեւ: Խոսքն ավելի քան 80 ընտանիքի մասին է, որոնց իրազեկել են, որ եթե մինչեւ մայիսի 1-ը չկատարեն վարկային պարտավորությունները, ապա հիպոթեքային վարկը ժամկետանց կճանաչվի, և կբռնագանձվի նրանց գույքը։ 2020 թ. պատերազմից հետո Արցախի կառավարության 2022թ․ մայիսի 10-ի 505-Ն որոշմամբ ՀՀ-ում բնակարան ձեռք բերելու համար այս ընտանիքներին սերտիֆիկատներ են տրամադրվել։ Ըստ որոշման՝ վկայագիրը երաշխավորում է ՀՀ-ում հիփոթեքային վարկի միջոցով բնակտարածքի ձեռքբերման նպատակով պետական աջակցության տրամադրում։ Կնքված պայմանագիրը եռակողմ է՝ վարկառու ընտանիքի, բանկի ու Արցախի բնակարանային հարցերով կոմիտեի միջև։ Վարկերը նախկինում վճարվել են Արցախի ներդրումային հիմնադրամի միջոցներից։

Իսկ 2023 թ. սեպտեմբերյան իրադարձություններից հետո, երբ Արցախը հայաթափվեց, այս խնդիրը ծագեց՝ այդ ժամանակվանից սառեցվել են վարկերը, և շաբաթներ առաջ միայն մարդկանց ծանուցել են, որ եթե չվճարեն վարկը, գույքի բռնագանձման գործընթաց կսկվի։ Մինչդեռ, արցախցիների կարծիքով, ՀՀ պատկան մարմինները 1 օրում կարող են լուծել խնդիրը՝ վերագրանցելով ԱՀ ներդրումային հիմնադրամը, որն Արցախբանկի ավելի քան 45 տոկոսի բաժնետեր է և կարող է շարունակել կատարել իր պարտավորությունները։ Հավանաբար, ՀՀ իշխանությունները որոշել են տնից զրկել այդ ընտանիքներին, գույքը խլել եւ ստիպել, որ արտագաղթեն Հայաստանից»: