«Մեր հիմնավոր փաստարկները կառավարությունը չի ընդունել»․ Նժդեհ Իսկանդարյան

«Մեր հիմնավոր փաստարկները չեն ընդունվել»,- այս մասին, այսօր լրագրողների հետ զրույցում փոխվարչապետ Տիգրան Խաչատրյանի հետ հանդիպումից հետո նշեց Արցախցիների իրավունքների պաշտպանության խորհրդի անդամ Նժդեհ Իսկանդարյանը:

«Իրենց կողմից ևս եղել են առաջարկներ, որոնք մենք չենք ընդունել, բայց համաձայնության եզրեր, այնուամենայնիվ, եղել են: Կառավարությունը պատրաստ է ևս 2 ամսով 40 հազար դրամ աջակցությունը տրամարդել, հետքայլ եղել է մասնակի: 50 հազար դրամ աջակցության ծրագրի մասին խոսք լինել չի կարող, միայն 40 հազար դրամ՝ յուրաքանչյուր անձի համար»,- նշեց Իսկանդարյանը՝ հավելելով, որ ևս 2-3 օր արցախցի մտահոգ քաղաքացիների հետ հանդիպումից հետո խորհուրդը հանդես կգա հայտարարությամբ:

«Վրանը շարունակելու է մնալ այստեղ դրա մասին խոսք լինել չի կարող: Մենք հստակ մեր դիրքորոշումն ասել ենք՝ սա միայն սոցիալական պահանջ չէ, մենք խոսելու ենք հավաքական վերադարձի, գերիների հարցի մասին, ու մեր պայքարը շարունակվելու է: Ձևաչափը միգուցե կարող է փոխվել, բայց պայքարը շարունակվելու է»,- ընդգծեց Իսկանդարյանը: