«Հենց հասկանա՝ ՌԴ-ն հաղթում է, էլի ականատես կլինենք՝ «Լադիմիր Լադիմիրովիչ սպասիբը»-ների շարքին»․ Էդուարդ Շարմազանով

«Զարմանում եմ, որ էս օրով անամոթության շքերթ են կազմակերպում և նույնիսկ գալիս են այստեղ»,- Հաղթանակի զբոսայգում, անդրադառնալով իշխանության ներկայացուցիչների այցին, ասաց ՀՀԿ ԳՄ անդամ Էդուարդ Շարմազանովը։ «ՔՊ-ական ողջ խմբակը՝ Նիկոլի գլխավորությամբ, արեց այնպես, որ այսօր եռատոնը նշում ենք մրմուռը սրտում, որովհետև եռատոնի գլխավոր խորհրդանիշներից էին Արցախի բանակի ստեղծումն ու Շուշիի ազատագրումը, իսկ Նիկոլ Փաշինյանը Պրահայում Արցախը ճանաչել է Ադրբեջանի կազմում։ Ես ասել եմ՝ ինքը պատմության մեջ մնալու է որպես կապիտուլյանտ»,- ասաց Շարմազանովը։
Նրա խոսքով Նիկոլ Փաշինյանը գնացել է Մոսկվա, որովհետև լավ չի կողմնորոշվում, թե ինչպես կավարտվի ուկրաինական ճգնաժամը․ «Հենց հասկանա, որ ճգնաժամն ավարտվելու է Ռուսաստանի հաղթանակով, էլի ականատես կլինենք՝ «Լադիմիր Լադիմիրովիչ սպասիբը»-ների շարքին։ Իսկ Աստված չանի, եթե Ռուսաստանը անհաջողության մատնվի, որի հեռանկարը գրեթե զրոյական է, այն ժամանակ էլի կխոսի հակառուսականությունից, բայց Նիկոլ Փաշինյանը, դասական առումով, թուրքամետ գործիչ է, սպասարկում է Թուրքիայի շահերը ու Հայաստանը դարձրել է թուրքական շահերի սպասարկման վայր»,- ասաց Շարմազանովը։