Ադրբեջանի ԱԳՆ-ն բացատրություն է պահանջել Ռուսաստանից

Ադրբեջանի արտաքին գործերի նախարարությունը հայտարարություն է տարածել Եկատերինբուրգում ադրբեջանցիների ձերբակալությունների կապակցությամբ։

«Մենք խորը մտահոգություն ենք հայտնում հունիսի 27-ի առավոտյան Եկատերինբուրգում ադրբեջանցիների տների վրա Ռուսաստանի ԱԴԾ-ի կողմից իրականացված խուզարկությունների կապակցությամբ, որոնց արդյունքում մեր հայրենակիցները զոհվել են, ոմանք ստացել են ծանր մարմնական վնասվածքներ, իսկ ինը մարդ ձերբակալվել է։

Մենք ակնկալում ենք, որ ռուսական կողմը անհապաղ հետաքննություն կանցկացնի այս գործով և հնարավորինս շուտ պատասխանատվության կենթարկի այս անընդունելի բռնության ակտի համար պատասխանատուներին»,- նշել է ԱԳՆ-ն։