«Զարմանո՞ւմ եք, որ երեխաների մորն են կալանավորել․ երեխաներ էլ են ծնվում բանտերում»․ Գևորգ Թոսունյան

Լրագրող Գևորգ Թոսունյանի ֆեյսբուքյան գրառումը․ «Զարմանո՞ւմ եք, որ մանկահասակ երեխաների մորն են կալանավորել, իսկ եթե իմանաք, որ երեխաներ են ծնվում բանտերում։
Մի տեսարանի ես ականատես էի եղել ուղիղ մեկ տարի առաջ։
Մեզ տարան Աբովյան քրեակատարողական հիմնարկի նոր վերանորոգված մասնաշենքի միջանցք։ Երբ ներս մտանք, մի կին էր պատին ամրացված հեռախոսով զրուցում, դիմացը՝ մանկասայլակ, մեջը՝ երեք տարեկան սևահեր մի աղջիկ։ Փոքրիկը ժպտում էր ու այդպես ժպտալով էլ հեռախոսազանգից հետո բանտային աշխատակիցը նրանց ուղեկցեց դեպի կացարան, որի ճաղերն այդ ժամանակ բաց էին, նրանք ներս մտան, բանտային աշխատակիցը նախ դուռը կողպեց, հետո՝ ճաղերը։
Փշաքաղվելու տեսարան էր․ փոքրամարմին մայրը, պուճուր ու պայծառ մի երեխա ու փակված դուռ, ճաղեր։ Կինը գտնվում է կալանքի ռեժիմում, մի քանի դրվագներով խարդախություններ է արել, իսկ նրա դուստրը ծնվել է բանտում»։