Դատարանը 9 մլն դրամի կալանք է դրել Արսեն Թորոսյանի հաշիվների վրա. «Հրապարակ»

«Հրապարակ»-ը գրում է. «Դատարանը 9 մլն դրամի կալանք է դրել ԱԺ ՔՊ-ական պատգամավոր Արսեն Թորոսյանի հաշիվների վրա՝ Սամվել Կարապետյանի պահանջով:
Վերջինս զրպարտության և վիրավորանքի համար դիմել է դատարան՝ ընդդեմ Թորոսյանի, և պահանջել է հայցի ապահովման միջոց կիրառել՝ արգելանք դնել նրա հաշիվների վրա։

Միջնորդությունը բավարարվել է: Թորոսյանն ԱԺ ամբիոնից հայտարարել էր. «Ես 2 հայտարարության եմ ուզում անդրադառնալ, որոնց հեղինակների պորտը ոնց որ թե Լուբլյանկայում են կտրել, ФСБ-ի շտաբ-կվարտիրայում։ Առաջինի անունն Արշակ ա։

Հիմա մյուս հերոսին անդրադառնամ, նույն ինքը՝ Սամվել Կարապետյանին»։ Այս հայտարարությունը, ըստ Կարապետյանի փաստաբանների, պարունակում է և վիրավորանք, և զրպարտություն։

Թորոսյանից պահանջում են հրապարակային ներողություն խնդրել նույն ամբիոնից և բարոյական վնասի փոխհատուցում վճարել՝ 9 մլն-ի չափով։

Բացի այս հայցից, գործարարի կողմից ՔՊ-ական պատգամավորների, փորձագետների և կայքի դեմ ևս 9 դատական հայց է ներկայացվել՝ անձի «պատիվը, գործարար համբավը և քաղաքական նկրտումները պաշտպանելու համար»»: