Կայա Կալասը մեղադրել է Ռուսաստանին Բալթիկ ծովում մալուխները վնասելու մեջ

Եվրոմիության արտաքին գործերի նախարար Կայա Կալասը կրկին մեղադրել է Ռուսաստանին Բալթիկ ծովում մալուխների վնասման միջադեպերին մասնակցելու համար։
«Եվրոպայի կարևորագույն ենթակառուցվածքները շարունակում են մնալ դիվերսիայի բարձր ռիսկի տակ»,- գրել է նա X սոցիալական ցանցում։ Կալասը նշել է, որ Ուկրաինայում հակամարտության սկզբից ի վեր Բալթիկ ծովում Ռուսաստանի կողմից միջադեպերի «հստակ միտում» է նկատվել։
Ֆինլանդիայի իրավապահ մարմինները չորեքշաբթի օրը կալանավորել են նավ, որը, ենթադրաբար վնասել է Հելսինկիի և Տալինի միջև անցնող Elisa ստորջրյա մալուխը։ Helsingin Sanomat թերթի տվյալներով՝ խոսքը Fitburg նավի մասին է, որը նավարկում էր Սենթ Վինսենթի և Գրենադինների դրոշի ներքո և Ռուսաստանից ուղևորվում էր Իսրայել։
Իշխանությունները հետաքննում են միջադեպը՝ որպես լուրջ վնաս և հաղորդակցության խաթարում։ Helsingin Sanomat-ի տվյալներով՝ վնասվել է երկու մալուխ, որոնցից մեկը պատկանում է շվեդական Arelion ընկերությանը։ Ռուսաստանի նախագահի օգնական և Ծովային խորհրդի նախագահ Նիկոլայ Պատրուշևը նախկինում նշել էր, որ ստորջրյա մալուխների և ռուսական նավերի հետ կապված մի շարք տարօրինակ միջադեպեր ենթադրում են, որ Արևմուտքը լրջորեն որոշել է բարձրացնել լարվածությունը՝ Բալթիկ ծովը վերածելով չհայտարարված հիբրիդային պատերազմի ասպարեզի։
Նման միջադեպերին Մոսկվայի ներգրավվածության մասին պնդումները նպատակ ունեն խոչընդոտել ռուսական նավթի արտահանումը, նշել է Արտաքին գործերի նախարարության խոսնակ Մարիա Զախարովան։ Նրա խոսքով՝ ՆԱՏՕ-ն օգտվել է իրավիճակից՝ Բալթիկ ծովում իր ռազմական ներկայությունը մեծացնելու համար։