«ՀՀ իշխանություննե՛ր, ի՞նչ եք մտածում ձեր թանկագին «ընկեր» Ալիևի հայտարարությունների մասին»․ Արման Աբովյան

ԱԺ նախկին պատգամավոր Արման Աբովյանի ֆեյսբուքյան գրառումը. «Դի ինչ, տարին հետաքրքիր սկսվեց... օրինակ, Ալիևը՝ որպես ներկայիս Հայաստանի իշխանությունների կողմից ներկայացվող «կառուցողական, կրթված, սիրված և անչափ հարգված» «ընկեր, եղբայր և գործընկեր», հերթական անգամ՝ իր սովորական, ադրբեջանական ոճով նրանց դրեց բավական անհարմար դրության մեջ։
Ալիևի մի հարցազրույց է տվել ադրբեջանական ԶԼՄ ներին, որտեղ կրկին հնչեցրել է բավականին վտանգավոր թեզեր, սակայն իշխանամետ մեդիան հրապարակում է հարցազրույցի միայն այն հատվածը, որտեղ Ալիևը խոսում է հաղորդակցությունների բացման և իբր «խաղաղության» մասին։ Մնացածն իշխանամետ լրատվամիջոցները համեստորեն լռության են մատնում։
Գուցե՞ այն պատճառով, որ մտածում են՝ միայն իրենք ունեն ինտերնետ և կարող են անպատիժ կերպով մանիպուլացնել Հայաստանի հասարակական կարծիքը։
Ես որոշակի շփոթի մեջ եմ, որովհետև մենք բոլորս էլ գիտենք, որ ներկայիս հայաստանյան իշխանությունները երբեք չեն ստում, քանի որ այնքան ազնիվ ու «ժողովրդական» են, որ բառացիորեն ականջներից ծուխ է դուրս գալիս։
Եվ ահա, մեծ հետաքրքրությամբ սպասում եմ մեկնաբանությունների երկու առանցքային հարցերի վերաբերյալ, որոնք հնչեցրել է նրանց այդքան սիրելի ու պաշտելի «ընկերը և եղբայրը»՝ Ապշերոնի մազութոտ ափերից։
Այսպիսով, Ալիևը հայտարարել է, որ միջազգային իրավունքը չի գործում, և գործում է բացառապես ուժի գործոնը։
Ինչպե՞ս թե։ Չէ՞ որ դուք առավոտից երեկո մեզ պատմում էիք, թե զիջումներով, կեղծ դեմարկացիաներով ու դելիմիտացիաներով, «խաղաղության պայմանագրերով» դուք ապահովելու եք Հայաստանի անվտանգությունը։ Իսկ հիմա պարզվում է, որ ձեր սիրելի և թանկագին «ընկեր ու եղբայր» Ալիևը բացահայտ ասում է, որ իրեն խորապես չի հետաքրքրում միջազգային իրավունքը, որի վրա հղում է անում հայաստանյան իշխանությունը, երբ կրկին ստում է… ներողություն… երբ ասում է, որ «խաղաղության» մի թղթի համար պետք է անցնել միջազգային իրավունքի վրա հիմնված որոշակի գործընթացներ։ Օրինակ՝ սահմանների դեմարկացիա։
Երկրորդը։ Ձեր այդ նույն սիրելի «ընկեր և եղբայր» Ալիևը հայտարարում է, որ Թրամփի համաձայնությամբ (այդ նույն Թրամփի, որին նույնպես չի հետաքրքրում միջազգային իրավունքը) Հայաստանի իշխանությունները կտրամադրեն այսպես կոչված «Զանգեզուրի միջանցքը», և բոլորովին կարևոր չէ, թե ինչպես այն կկոչվի (օրինակ՝ TRIPP կամ BDSM)․ կարևորն այն է, որ միջանցքի էությունը պահպանվի։
Ի՞նչ է, Ալիևը չի՞ կարդում իշխանամետ մամուլը, որը առավոտից երեկո տարածում է տեղեկություն «եկած խաղաղության» և չար «ռևանշիստների» մասին։
Խնդրում եմ, ՀՀ իշխանություններ՝ ինչ եք մտածում ձեր այդքան սիրելի ու թանկագին «ընկեր» Ալիևի հայտարարությունների մասին՝ իր իսկ վերը նշված պնդումների կապակցությամբ»։