«Դատարանում պրոցես է գնում, բայց Աղվան Հովսեփյանը ճոխ մեքենաներով գնում-գալիս է Սարյանի իր հսկա տուն». Անդրանիկ Քոչարյան

«Ինչքան էլ իրացնում ենք, ինչքան էլ քրեադատավարական պրոցեսներ են գնում դատարանում՝ ունեցվածքի հետ կապված, բայց հարցադրումներ կան, ասում են՝ էդքան անուններ եք ասում, բայց ունեցվածքը տնօրինվում է էդ մարդկանց կողմից: Օրինակ Աղվան Հովսեփյանը: Դատարանում պրոցես է գնում, բայց ճոխ մեքենաներով Սարյանի իր հսկա տնից դուրս է գալիս, գնում Բյուրական, և այլն: Այս մասով ի՞նչ կասեք»,- ԱԺ-ում դիմելով ՀՀ հակակոռուպցիոն կոմիտեի նախագահ Արթուր Նահապետյանին՝ հարցրեց ՔՊ-ական պատգամավոր Անդրանիկ Քոչարյանը: Պաշտոնյան ասաց, որ Հակակոռուպցիոն կոմիտեն զբաղվում է կոռուպցիոն հանցագործությունների նախաքննությամբ ու այդ ընթացքում երբ հայտնաբերվում է արգելադրման ենթակա գույք, կիրառում է արգելադրումներ, սակայն գույքերի հետագա բռնագանձումը, ճակատագրի հետագա որոշումը դատական պրոցեսների հետ է կապված: Հարցը գտնվում է դատախազության տիրույթում: