Իսրայելի հարվածների հետևանքով Լիբանանում զոհվել է ավելի քան 100 մարդ

572

Հինգշաբթի, 05 մարտի, 2026 թ., 23:09

Մարտի 2-5-ը Լիբանանի վրա Իսրայելի կողմից իրականացված հարվածների հետևանքով զոհերի թիվը հասել է 102-ի, 638-ը վիրավորվել է, հաղորդում է «Ալ Ջազիրա»-ն՝ հղում անելով երկրի առողջապահության նախարարությանը։

Լիբանանի վրա Իսրայելի հարձակումներն սկսվել են, երբ Իրանի կողմից աջակցվող «Հեզբոլլահը» 2026 թվականի մարտի 2-ին սկսել է ռմբակոծել Իսրայելի հյուսիսային քաղաքները։

Լիբանանի վարչապետ Նավաֆ Սալամը մարտի 5-ին հայտարարել է, որ երկրի իշխանությունները որոշել են արգելել Իսլամական հեղափոխության պահապանների կորպուսի (ԻՀՊԿ) բոլոր ռազմական գործունեությունը Լիբանանի տարածքում։ Մարտի 2-ին Լիբանանի կառավարությունը նույնպես արգելել է «Հեզբոլլահի» զինված գործունեությունը։

Իսրայելի պաշտպանության բանակի շտաբի պետ Էյալ Զամիրը հայտարարել է, որ Իսրայելը կշարունակի իր ռազմական գործողությունները Լիբանանում մինչև «Հեզբոլլահի» լիակատար զինաթափումը։ Ավելի ուշ ԻՀՊԿ-ն իր Telegram ալիքով հայտնել է, որ Իսրայելի ռազմաօդային ուժերը սպանել են Իրանի ԻՀՊԿ լիբանանյան կորպուսի փոխհրամանատար Հասան Մահվադիին։ Նա վերահսկում էր «Հեզբոլլահի» գործունեությունը իրանական կողմում։