«Իշխանությունը զբաղվում է իմիտացիայով»․ Արեգ Սավգուլյան

Պատմաբան Արեգ Սավգուլյանը ֆեյսբուքյան իր էջում գրել է․ «Քայլ արա, մերժիր Սերժին» լոզունգներով իշխանության եկած թավշյա խունտան թվում է, թե պետք է գահընկեց աներ բոլոր օդիոզ կերպարներին, որոնց դեմոնիզացիայի և հրեշացման ուղղությամբ տիտանական բացահայտ և ստվերային աշխատանք էր կատարել։ Այդ կերպարների շարքին էր դասվում 3-րդ նախագահ Սերժ Սարգսյանի եղբայր Ալեքսանդր Սարգսյանը։ «Սաշիկի 50-50» միֆը բազմաթիվ ասեկոսեների և անեկդոտների տեղիք էր տվել, ըստ այդմ՝ երկրում չկար մեկը, որի հետ Սաշիկը չլիներ «50-50 փայ մտած», անգամ եթե նա գիշերով դուրս էր գալիս, լինում էր կեսգիշեր (կատակում էին):
Հիմա փաստերով Ալ. Սարգսյանի դեմ քրեական գործ հարուցվեց Մարտիրոս Սարյանի նկար գնելու և չվճարելու հետ կապված՝ սեփականատիրոջ ցուցմունքի հիման վրա։ Ալ. Սարգսյանի հաշվին կար 30 միլիոն դոլար, որը սառեցվեց, հետո ասվեց, որ նա այդ գումարը նվիրաբերել է պետությանը, հետո պարզվեց, որ ո՛չ, հիմա հայտնի չէ։ Բայց Հայաստանում գործող ոչ մի բիզնեսմեն քրեական գործով հանդես չեկավ նրա դեմ, չպահանջեց իրենից գողացված կամ խլված Սաշիկի 50 տոկոսը։ Սա փաստ է։
2020 թվականի կապիտուլյացիայից հետո Սաշիկի կերպարը մոռացվեց և դրա հիմնական դերակատարն ո՞վ էր, միգուցե նա, ով դեռ 2019 թվականին ասուլիսին հայտարարեց, որ «Վերջերս իրադարձություններ են ի հայտ գալիս, որ ես եզրակացնում եմ, որ Սաշիկն (Ալ. Սարգսյան) այդ ընտանիքում ամենաանմեղ դեմքն է» (ՆՓ):
Երեկ «Իշխանություն» լրատվականը, ի դեմս խմբագիր Լիա Սարգսյանի, տարածեց տեղեկատվություն, որ ինչ-ինչ քրեական գործի շրջանակներում Ալեքսանդր Սարգսյանին կալանավորելու որոշում է կայացվել։ Այսօր այդ նույն լրատվականից տեղեկացանք, որ Ալեքսանդր Սարգսյանը Հայաստանում չէ և ձերբակալման որոշումը չի կարող իրագործվել։
Ի՞նչ է ստացվում, որ տարիներ շարունակ իշխանություն դարձած նախկին ընդդիմությունը հներին սևացրել է և երդում կերել, որ թալանը վերադարձնելու է, բայց զբաղվում է իմիտացիայով։ Փաստացի ստացվում է՝ ՀՀ 3-րդ նախագահի, նրա երկու եղբայրների Լևոն և Ալեքսանդր Սարգսյանների, նրա փեսայի՝ Միքայել Մինասյանի, խնամու՝ Արա Մինասյանի դեմ հարուցվել են քրեական գործեր, բայց դրանց շրջանակներում հիմնական դերակատարում ունեցողները Հայաստանում չեն։
Հ.Գ. Ոչ մեկը հին փաղանգից, որ լրջագույնս ազդել է Հայաստանում քաղաքական գործընթացների վրա, որի մեջ չի մտնում վերոնշյալ Ալ. Սարգսյանը, քրեակատարողական հիմնարկում չէ։ Ինչո՞ւ։ Կա՛մ նշված բոլոր անձանց դեմ բոլոր քրեական գործերը շինծու են, կա՛մ Նիկոլը պարում է իր կողմից դեմոնիզացվաժ հների դուդուկի տակ։ Դատե՛ք ինքներդ, որտեղ է ճշմարտությունը, որը հուսով եմ կպարզվի արմատական իշխանափոխությունից հետո»։