Նեթանյահուն և Կացը հրահանգել են ավերել Լիբանանի Լիտանի գետի բոլոր կամուրջները

Իսրայելի պաշտպանության նախարար Իսրայել Կացը հայտարարել է, որ ինքը և երկրի վարչապետ Բենիամին Նեթանյահուն զինվորականներին հրահանգել են արագացնել Լիբանանի հարավային սահմանի երկայնքով տների քանդումը և ավերել Լիտանի գետի բոլոր կամուրջները, որոնք հարավային Լիբանանը կապում են երկրի մնացած մասի հետ, հայտնում է CNN-ը:

Կացն ասել է, որ Իսրայելի նպատակն է կտրել «Հեզբոլլահ» շարժման մատակարարման գծերը, կանխել զենքի տեղաշարժը և պաշտպանել Իսրայելի հյուսիսում բնակվող մարդկանց:

«Իսրայելի պաշտպանության բանակը կշարունակի աջակցել հարավային Լիբանանի բնակիչների տարհանմանը մարտական գործողությունների գոտուց՝ Լիտանի գետից դեպի հյուսիս՝ նրանց պաշտպանության համար»,- նշել է նա:

Սա տեղի է ունեցել այն բանից հետո, երբ իսրայելցի զինվորականները հաստատել են այս շաբաթ Լիտանի գետի վրա գտնվող երկու խոշոր կամուրջների ավերումը, ինչը փաստացի մեկուսացրել է գետից դեպի հարավ գտնվող այն քաղաքացիական անձանց, որոնք չեն կարողացել տարհանվել մինչև հարվածները, ինչպես նաև փակել է սննդամթերքի և դեղորայքի մատակարարման ուղիները: