Թրամփը փորձում է ժամանակ շահել ԱՄՆ-ի ռազմական ծրագրերի համար. Իրանի ԱԳՆ

Իրանը որևէ բանակցություն չի վարում Միացյալ Նահանգների հետ, հայտարարել է Իրանի արտաքին գործերի նախարարությունը: Ըստ նախարարության՝ ԱՄՆ-ի նախագահ Դոնալդ Թրամփը հայտարարել է երկու կողմերի միջև արդյունավետ շփումների մասին՝ ուղղված էներգակիրների գների իջեցմանը և իր ռազմական ծրագրերն իրականացնելու համար ժամանակ շահելուն: «Տարածաշրջանային երկրները առաջ են քաշում լարվածությունը նվազեցնելու նախաձեռնություններ, և մեր պատասխանը բոլորին հստակ է. մենք այն կողմը չենք, որը սկսել է այս պատերազմը, և այս բոլոր խնդրանքները պետք է ուղղվեն Վաշինգթոնին», - ասվում է Իրանի արտաքին գործերի նախարարության հայտարարության մեջ, որը մեջբերել է Mehr լրատվական գործակալությունը:

Դոնալդ Թրամփն այսօր հայտարարել է, որ վերջին երկու օրերի ընթացքում Իրանի հետ շփումներից հետո ինքը հանձնարարել է Փենթագոնին՝ չհարվածել Իրանի էներգետիկ ենթակառուցվածքներին առաջիկա հինգ օրերի ընթացքում: Հետագա որոշումները կախված կլինեն «ընթացիկ հանդիպումների և քննարկումների» արդյունքներից, բացատրել է ԱՄՆ-ի նախագահը: