«Ձևավորվել է վտանգավոր երևույթ՝ թե արցախցիները բան են պարտք հայաստանցիներին»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Այս տարիների ընթացքում ամենաեղկելի ու միաժամանակ վտանգավոր երևույթներից մեկն այն մտայնությունն է, որ ձևավորվել է մի ստվար շրջանակում՝ թե արցախցիները բան են պարտք հայաստանցիներին:
Այս մտայնությունը եղել է վաղուց, թերևս միշտ, բայց նաև շատ հստակ է, որ հետևողականորեն սնուցվել, հունցվել, գեներացվել է 2022-ից հետո՝ շատ հստակ քաղաքական նպատակներով, ընդհուպ պետական մակարդակով, միաժամանակ շատ նուրբ տեխնոլոգիաներով՝ կրակը տալ, հետո «ներողություն» խնդրել, թեև «հրդեհը» շարունակվում է տարածվել:
Արցախցի մեր հայրենակիցները որևէ բան պարտք չեն հայաստանցիներին, ինչպես մարդու մարմնի որևէ մաս պարտք չէ մեկ այլ մասի, որևէ օրգան՝ պարտք չէ մեկ այլ օրգանի: Հայաստանն ու Արցախը եղել են անվտանգության մեկ ճարտարապետություն, ընդ որում այդ բառի՝ բոլորովին ոչ միայն պաշտպանական-ռազմական իմաստով, այլ տնտեսական, քաղաքական, քաղաքակրթական, հոգևոր-արժեքային:
Այդ օրգանիզմը ունեցե՞լ է «իդեալական առողջություն»: Իհարկե՝ ոչ: Բայց ո՞րը պետք է լիներ Հայաստանում որևէ բեկումնային, շրջադարձային փոփոխության իմաստ ու նպատակ՝ բերել անդամհատմա՞ն, թե՞ առավելագույնն անել օրգանիզմն առողջացնելու համար: Իսկ անդամհատումը լոկ ֆիզիկական կորուստը չէ: «Անդամհատման» պրոցեսը շարունակվում է մտավոր-հոգեբանական մակարդակում, ու դրա ցավալիորեն վառ դրսևորումներից մեկը հենց այն մտայնության սնուցումն է, թե արցախցիները ինչ որ բան են պարտք հայաստանցիներին:
Եվ որևէ կերպ կասկած իսկ չունենաք, որ այդ սնուցման համակարգի «ինժեներները»՝ հաջողության պատմություն ունենալու դեպքում, նույն անամոթ համառությամբ պատրաստ կլինեն ըստ կոնյուկտուրային անհրաժեշտության ասել նույնը «սյունեցիների» և «հայաստանցիների», «շիրակցիների» ու «հայաստանցիների», տո անգամ՝ «հայաստանցիների» ու «երևանցիների» մասով»: