«Դավիթը նորմալ չի էլ գիտակցում, թե ուր է հայտնվել, ինչու է հայտնվել». փաստաբան

«Արմավիր» ՔԿՀ-ի դիմաց փաստաբան Արմեն Մելքոնյանը լրագրողների հետ զրույցում հաստատեց, որ տեսակցել է 18-ամյա Դավիթ Մինասյանին. «Թույլ էր, բայց ընդհանուր վիճակը գնահատում եմ նորմալ: Հետը մեկ խցակից կա: Իր համար նոր փորձություն է, նոր աշխարհ, նորմալ չի էլ գիտակցում, թե այս ուր է հայտնվել, ինչու է հայտնվել: 18 տարեկան երեխայի խառնված ներքնաշխարհ, բայց կարծում եմ՝ դուրս կգա այս իրավիճակից, ուժեղ տղա է»:

Հարցին, թե ինչ է պատմում տղան Փաշինյանի մասնակցությամբ միջադեպի մասին, ասաց. «Գնացել էր եկեղեցի պատարագի, եկան, անտեղի իրեն գցեցին, հարվածեցին, հայհոյեցին, որից հետո ձերբակալեցին ու կալանավորեցին»:

«Այս քրեակատարողական հիմնարկի աշխատակիցների մեջ ես բարեխիղճ մարդիկ եմ տեսել: Դրական խոսքեր ասեմ, էս մարդկանց գործից կհանեն»,- հավելեց նա: