«Նկատեցի, որ գերիշխում էր ինքնառեկլամը, սգո օրը քաղաքական վարկանիշի համար օգտագործելը»․ Գարիկ Քեռյան

Քաղաքագետ Գարիկ Քեռյանի ֆեյսբուքյան գրառումը. «Հայոց ցեղասպանության զոհերի հիշատակի օրն անցավ: Տասնյակ հազարավոր հայեր հայրենիքում և արտերկրում անկեղծ սգում էին: Սա ազգային համախմբման արտահայտություն էր: Մտորելով անցած օրվա իրադարձությունների ընթացքի մասին նկատեցի նաև, որ գերիշխում էր ավելի շատ պաթոսը, ինքնառեկլամը, սգո օրը քաղաքական վարկանիշի համար օգտագործելը, ձևականությունը: Երկար ժամանակ է, որ մտածում եմ այն մասին, որ Մեծ Եղեռնի օրը ոչ աշխատանքային օր է: Որպես կանոն բոլոր երկրներում ոչ աշխատանքային լինում են տոնական օրերը, ոչ աշխատանքայինի մեջ ինչ-որ դրական ենթատեքստ կա, որը չպետք է լինի սգո օրերի և զոհերի ոգեկոչման ժամանակ: Եթե չեմ սխալվում հոլոքոստի առիթով ոչ աշխատանքային օր Իսրայելում չկա: Հայրենիքի բարգավաճումն ու հզորացումն է ցեղասպանության զոհերի ամենամեծ հիշատակը, այդ օրը Հայաստանի ժողովուրդը առավել մեծ նվիրումով պետք է աշխատի հանուն մեր ազգի լավ ապագայի: Իմ կարծիքով տարվա մեջ բազմաթիվ առիթներով և միջոցառումներով կարելի հիշատակել 1915 աղետաբեր թվականը, մշտապես այցելել Ծիծեռնակաբերդ, միայն մեկ օր այսպիսի զանգվածային հոսքը դեպի հուշարձան արդյո՞ք ճիշտ է: Վերը նշված անցանկալի իրողություններից սգո օրը պետք է ազատել»: