«Հնարավոր է՝ Քոնգրեսի ընտրությունից առաջ Թրամփին անհրաժեշտ լինի ակտիվացնել օժանդակությունը Ուկրաինային». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Կրեմլում Պուտինի հետ Ուիթոքֆի և Քուշների բանակցության արդյունքի մասին խոսելը դժվար է, որովհետև այդպիսի բանակցության արդյունքը լինում է թերևս օրերի, շաբաթների, իսկ գուցե ամիսների ընթացքում։ Հնարավոր չէ տեսնել այդ արդյունքը մի քանի ժամ անց։ Կարող ենք դիտարկել հայտարարությունները, և այդ իմաստով հետաքրքության է արժանի Պուտինի օգնական Ուշակովի խոսքը։ Մասնավորապես այն հատվածը, երբ նա նշում է, որ ռուսական կողմը հայտնել է պատերազմի բոլոր նպատակներին հասնելու վստահություն։

Հետաքրքիր ձևակերպում է, որովհետև թողնում է տպավորություն, թե Ուիթքոֆն ու Քուշները հարցրել են՝ կհասնե՞ք նպատակներին, ռուսական կողմն էլ հայտնել է վստահություն, որ՝ կհասնեն։

Իհարկե հարցնելու մասին արձանագրումն անում եմ այսպես ասած պատկերավոր իմաստով։ Հազիվ թե լիներ այդպիսի ուղիղ հարց, բայց ըստ երևույթին այդտեղ է եղել ուկրաինական թեմայով ինտրիգը։

Հնարավոր է, որ Քոնգրեսի միջանկյալ ընտրությունից առաջ Թրամփին անհրաժեշտ լինի որոշակիորեն ակտիվացնել օժանդակությունը Ուկրաինային, առնվազն իմիտացիոն տրամաբանությամբ, ինչը իհարկե այդուհանդերձ կենթադրի գործնականում նվազագույն ակտիվացում և ավելացում։ Մեծ հավանականությամբ, Մոսկվա այցի բուն հարցը եղել է հենց դա՝ իրազեկել անելիք քայլերի մասին, միաժամանակ հասկանալ, թե Մոսկվան դրանք որքանով կդիտի պայմանավորվածությունների խախտում»: