«Հայտնաբերեցի, որ Նաիրի Հունանյանը վերաքննիչ բողոք չի ներկայացրել, բայց ես վստահ եմ՝ ներկայացրել է»․ Գագիկ Ջհանգիրյան

«Վերջերս փաստաթղթերի վերանայումների ժամանակ հայտնաբերեցի, որ իր ցմահ դատապարտման ակտի դեմ Նաիրի Հունանյանը վերաքննիչ բողոք չի ներկայացրել»,- ասուլիսի ժամանակ հայտնել է նախկին զինդատախազ Գագիկ Ջհանգիրյանը։ «Բայց ես վստահ եմ, որ նա բերել է այդ բողոքը, որը ԱԱԾ որևէ պաշտոնյայի կամ մեկուսարանի պաշտոնյայի գզրոցում ընկած է եղել, ուղղակի երևի այդ բողոքը պարունակել է այնպիսի բաներ, որ այդ օրվա իշխանությունները վտանգավոր են համարել դատարանում այդ բողոքի հրապարակայնացումը, քննությունը։ Վստահ եմ նաև, որ ինքը մի քանի բողոք է գրել և եղբոր անունից, և քեռու անունից, գուցե նաև բժշկի անունից, որովհետև ինքը տարբեր մեղադրյալների և կալանավորվածների անունից դիմումներ գրելու սովորություն ուներ»,- շարունակել է նա։