Իրանում անկարգություններից հետո տարրական դասարաններում արգելել են անգլերենի դասավանդումը

Իրանի կրթական բարձրագույն խորհրդի ղեկավար Մեհդի Նավիդ Ադհամը հայտնել է, որ երկրի կառավարությունն արգելել է տարրական դասարաններում անգլերենի դասավանդումը:

«Կառավարական և ոչ կառավարական նախակրթական դպրոցներում անգլերենի դասավանդումն ըստ պաշտոնական ժամանակացույցի խախտում է օրենքներն ու նորմերը»,- նրա խոսքն է մեջբերում The Jerusalem Post-ը:

Ավելի վաղ անգլերենի դասավանդումից բխող սպառնալիքների մասին հայտարարել էր Իրանի հոգևոր առաջնորդ այաթոլա Ալի Համենեին: Նրա խոսքով՝ անգլերենի դասավանդումն «ուղի է բացում դեպի արևմտյան մշակութային էքսպանսիա»:

Իրանում անգլերենի դասավանդումն սկսվում է միջնակարգ դպրոցում, որտեղ սովորում են 12-14 տարեկան երեխաներ: