«Այն, ինչ այժմ կատարվում է Սիրիայում, ցեղասպանություն է». Կնյազ Հասանով

Երեկվանից Թուրքիան ռազմական գործողություններ է իրականացնում քրդերի դեմ Սիրիայի հյուսիս-արևելքում:

Հայաստանի քրդական համայնքի ղեկավար, ԱԺ պատգամավոր Կնյազ Հասանովը Հանրային հեռուստաընկերության եթերում նշել է, որ այն, ինչ այժմ կատարվում է Սիրիայում, ցեղասպանություն է. «Դա այս քանի տարիների ընթացքում պլանավորված է Թուրքիայի իշխանությունների կողմից: Անխնա ոչնչացնում են քրդերին՝ անկախ նրանից, թե քրդերը որտեղ են գտվում ՝ Թուրքիայում, Իրաքում, Սիրիայում, թե Իրանում: Այս պետության համար, կարծես թե, ցեղասպանությունը դարձել է ամենանախընտրելի երևույթներից մեկը»,- ասել է Հասանովը:

Թուրքագետ Անահիտ Վեզիրյանն էլ իր հերթին նշել է, որ նախքան Սիրիա ներխուժելը, Թուրքիան բավականին դիվանագիտական աշխատանք է տարել:

«Այնպես չէ, որ Թուրքիան ամբողջապես միայնակ է: Դիվանագիտական աշխատանքները, որ Թուրքիան մոտավորապես այս մեկ տարվա ընթացքում տարել է, այն շրջանից ինչ հայտարարել է այդ տարածքներ ներխուժելու մտադրության մասին, հասցրել են նրան, որ թե՛ Ռուսաստանը, թե՛ Իրանը, թե՛ ԱՄՆ-ն բարձր մակարդակով հայտարարում են, որ, այո՛, Թուրքիայի անհանգստությունները հարավային շրջանների հետ կապված Սիրիայի սահմաններին լեգիտիմացնում են: Այսինքն, դա կանաչ լույս է և դրանից հետո արվող արտահայտությունները կամ հայտարարությունները որևէ կերպ չեն կանխելու Թուրքիայի հարձակումը, որևէ ձևով չեն փորձելու խանգարել Թուրքիային»,- ասել է թուրքագետը:

Մանրամասները՝ տեսանյութում: