Մանվել Գրիգորյանի խափանման միջոց կալանքը գրավով փոխարինելու միջնորդության քննումը հետաձգվեց

393

Երեքշաբթի, 29 հոկտեմբերի, 2019 թ., 15:00

Հոկտեմբերի 29-ին Երևան քաղաքի ընդհանուր իրավասության դատարանում, դատավոր Մնացական Մարտիրոսյանի նախագահությամբ, տեղի ունեցավ ԱԺ նախկին պատգամավոր Մանվել Գրիգորյանի գործով հերթական դատական նիստը: Հրապարակվեց միջգերատեսչական բժշկական հանձնաժողովի եզրակացությունը: Դրա համաձայն՝ Մանվել Գրիգորյանի առողջական վիճակը խոչընդոտ չէ դատական նիստերին մասնակցելու համար: Բացի այդ, նշված էր այն մասին, որ Գրիգորյանի մոտ հայտնաբերված հիվանդությունները ներառված չեն կալանքի հետ անհամատեղելի հիվանդությունների ցանկում: Դատավոր Մ. Մարտիրոսյանը որոշեց դիմել բուժհիմնարկ, որպեսզի հաջորդ դատական նիստին ներկա լինի նաև Գրիգորյանը, որի բացակայության պատճառով տևական ժամանակ է, ինչ դատական նիստերը հետաձգվում են:

Մանվել Գրիգորյանի պաշտպան Լևոն Բաղդասարյանը միջնորդեց հաջորդ դատական նիստերին հարցաքննության հրավիրել եզրակացությունը տված փորձագետներին՝ նրանցից պարզաբանումներ ստանալու նպատակով: Ըստ Մ. Գրիգորյանի պաշտպանների՝ փորձագիտական եզրակացության մեջ վիճահարույց հանգամանքներ կան:

Լ. Բաղդասարյանը հայտարարեց, որ ինքը դատարան միջնորդություն է ներկայացնելու խափանման միջոցի վերաբերյալ: Դրան առարկեց մեղադրող կողմը՝ պնդելով, որ նման միջնորդության ներկայացումը օրենսդրության համաձայն՝ իրավաչափ չէ: Պաշտպանն էլ հակադարձեց, թե կյանքին վտանգ սպառնացող դեպքերում նման միջնորդությունները քննարկման առարկա են: Ի վերջո, դատարանը թույլատրեց պաշտպանին ներկայացնել միջնորդությունը: Լ. Բաղդասարյանը միջնորդեց խափանման միջոց կալանքը փոխարինել գրավով:

Նիստում որոշվեց հետաձգել փորձագետներ հրավիրելու միջնորդության քննարկումը՝ մինչև էական հանգամանքների պարզումը: Դատարանը գտավ, որ միջնորդության լուծման համար անհրաժեշտ հանգամանքներ պարզելու նպատակով պետք է հետագձել դատական նիստը: Հաջորդ դատական նիստը տեղի կունենա նոյեմբերի 5-ին: