Կիրակի, 15 դեկտեմբերի, 2019 թ.
|
Ստեփանակերտում`   +3 °C

«Տեսնենք՝ այսօրվա իշխանությունները որքանով ունակ կլինեն խախտելու այդ անպտուղ ավանդույթը». Արման Մելիքյան

«Տեսնենք՝ այսօրվա իշխանությունները որքանով ունակ կլինեն խախտելու այդ անպտուղ ավանդույթը». Արման Մելիքյան
86
Կիրակի, 24 նոյեմբերի, 2019 թ., 01:10

Արցախի նախկին արտգործնախարար Արման Մելիքյանը ֆեյսբուքյան էջում գրել է. «Ներկա պայմաններում Բաքուն դժվար թե համաձայնվի անցնել եռակողմ բանակցային ձևաչափի, եթե չբավարարվի, օրինակ, իր կողմից առաջադրվող նախապայմանն, ըստ որի Արցախը բանակցություններում պետք է ներկայացված լինի ադրբեջանական ու հայկական համայնքների պատվիրակների միջոցով: Սա որևէ իրավական հիմքից զուրկ պահանջ է, քանի որ Արցախի պետական կառավարման համակարգը երբևէ համայնական ձև չի ունեցել և նման բան նախատեսված չի եղել անգամ հենց Ադրբեջանի օրենսդրությամբ: Այսպիսով, Արցախի՝ բանակցային սեղանի մոտ վերադառնալու հնարավորությունը կարող է իրականություն դառնալ երկու սցենարով: Դրանցից մեկն ադրբեջանական նախապայմաններն ընդունելու տարբերակն է, բայց այդ սցենարի կիրառման դեպքում հաշվեք, որ պաշտոնական Երևանը նաև կանխավ համաձայնված կլինի տեսնելու Արցախն Ադրբեջանի կազմում: Երկրորդ տարբերակն այն կլինի, որ Ադրբեջանը կհրաժարվի վերոհիշյալ նախապայմանից և կհամաձայնվի, որպեսզի Արցախը բանակցություններում ներկայացված լինի սեփական պաշտոնական իշխանությունների՝ նախագահի ու արտգործնախարարի միջոցով: Այս տարբերակը մեզանում իրատեսական չեն համարում և, պետք է ասեմ, որ չհամարողները սխալվում են: Այլ հարց է, որ այն իրականություն դարձնելու համար պաշտոնական Երևանն ու Ստեփանակերտը պետք է մի շարք նախնական քայլեր կատարեն, որոնց միջոցով կփոխեն առկա բանակցային մթնոլորտը: Ցավոք, տարիներ շարունակ քաղաքականություն վարելը մեզանում շփոթել են բարձրագոչ հայտարարություններ անելու «արվեստի» հետ: Տեսնենք, թե այսօրվա իշխանությունները որքանով ունակ կլինեն խախտելու այդ անպտուղ ավանդույթը»: