Երեքշաբթի, 29 սեպտեմբերի, 2020 թ.
|
Ստեփանակերտում`   +8 °C

«Մի գործի շրջանակում՝ 7 ինքնաբացարկ. սա աննախադեպ երևույթ է». Քոչարյանի պաշտպան

«Մի գործի շրջանակում՝ 7 ինքնաբացարկ. սա աննախադեպ երևույթ է». Քոչարյանի պաշտպան
178
Երեքշաբթի, 10 դեկտեմբերի, 2019 թ., 23:50

«Աննախադեպ երևույթ է, երբ մի գործի շրջանակներում յոթ դատավոր ինքնաբացարկ են հայտնում»,- «Արմնյուզ» հեռուստաընկերության եթերում ասել է ՀՀ երկրորդ նախագահ Ռոբետ Քոչարյանի փաստաբան Հայկ Ալումյանը։ Վերջինի խոսքով՝ այն դատավորը, որը չի ուզում օրենքը խախտել, պետք է Ռոբերտ Քոչարյանին անհապաղ ազատ արձակի, իսկ նման բան անելու դեպքում ընկնելու է հուժկու հարվածի տակ։

«Վերաքննիչ քրեական դատարանի դատավոր Մխիթար Պապոյանին մենք ճանաչում ենք, իր գործում նա պրոֆեսիոնալ է, կոռումպացված չէ, բայց մենք չենք կարող պահանջել, որպեսզի նա լինի հերոս»,- ասել է Ալումյանը։

Հարցին, թե Քոչարյանի խափանման միջոցը փոխելը հերոսությո՞ւն է, Ալումյանը պատասխանել է, որ կարող ենք տեսնել, թե այն դատավորները, ովքեր փոխել են Քոչարյանի խափանման միջոցը, ինչ ճնշումների ու հայհոյանքների են արժանացել, դրանից կարելի է հետևություն անել։

Ալումյանը, խոսելով գործի հետագա ընթացքից, ասել է, որ բացարկի միջնորդությունը բավարարելով՝ Մխիթար Պապոյանը դժվարին կացության մեջ է գցել այն դատավորին, ով կվերցնի այս գործը. «Մխիթար Պապոյանին ես չեմ արդարացնում, պարզապես նա ցանկացել է ոչ թե օրենքը խախտել և Քոչարյանի խափանման միջոցը չփոխել, այլ նախընտրել է ավելի փոքր խախտում անել և բավարարել բացարկի միջնորդությունը։ Կա՛մ գործը կհայտնվի նրա նման դրական վարկանիշ ունեցող մի դատավորի մոտ, ով կհայտնվի Պապոյանի կացության մեջ, կա՛մ էլ կհայտնվի այնպիսի դատավորի մոտ, ով երջանիկ կլինի վերցնել այս գործն ու հաճոյանալ իշխանությանը»,-ասել է պաշտպանը։

Նրա խոսքով՝ կան այնպիսի դատավորներ, ովքեր իրենց պաշտոնը պահում են բացառապես օրվա իշխանությանը հաճոյանալով։

Մանրամասները՝ տեսանյութում:

Ռոբերտ Քոչարյանի պաշտպան Հայկ Ալումյանը՝ «Մարտի 1-ի» գործի մասին