Հայաստանից հնարավոր կլինի հեշտությամբ գնալ Անիի սահման՝ Շիրակի մարզով

ՀՀ Շիրակի մարզի մարզպետ Տիգրան Պետրոսյանը մարզխորհրդի տարեվերջյան նիստի ժամանակ հայտարարել է, որ ՀՀ վարչապետի, ՀՀ տարածքային կառավարման և ենթակառուցվածքների նախարարի, Շիրակի մարզպետարանի և պատասխանատու մի շարք կառույցների հետ համատեղ ամիսներ շարունակ ձգվող աշխատանքի շնորհիվ պատմական Անի մայրաքաղաքի հարևանությամբ գտնվող տարածքի մուտքի ռեժիմը փոփոխվելու է եկող տարվանից: Արդյունքում հայաստանցիները և երկիր ժամանող զբոսաշրջիկները հնարավորություն կունենան հայկական կողմից ավելի հեշտությամբ մուտք գործել տարածք: «Ես այսօր պատմական առաքելություն ունեմ,- ասել է նա:- Վարչապետի անունից հայտարարում եմ, որ հաջորդ տարվանից Անիի հետ սահմանը բացվում է հայաստանցիների և զբոսաշրջիկների համար և առանց դժվարության կարելի է փոխել սահմանային ռեժիմը»,- ասել է նա:

Նա նաև նշել է, որ այժմ սահմանային Նորշեն (Խարկով) գյուղ կարելի է մուտք գործել անարգելք և դրա համար պետք չէ վաղօրոք անցագիր ձեռք բերել: Նորշենն ու Անին դեմ դիմաց են և բաժանված են Ախուրյան գետով: