«Չի բացառվում, որ հանրային հավաքների վերաբերյալ որոշում կայացվի». Արսեն Թորոսյան

«Բազմիցս նշել եմ, որ ՀՀ ժամանող բոլոր ուղևորներին բոլոր էպիկ զոնաներից հնարավոր չէ մեկուսացնել, ինչպես հնարավոր չէ մեկուսացնել որևէ երկրում: Որպես օրինակ կարող եմ բերել Չինաստանից ժամանած մեր հարյուրավոր քաղաքացիներին, որոնց մոտ բարեբախտաբար կորոնավիրուս չի հայտնաբերվել: Մեկուսացում ցուցված է միայն հաստատված դեպքի անմիջական կոնտակտներին:

Ամեն բան արվում է ԱՀԿ-ի խորհուրդներին համապատասխան». մարտի 12-ին լրագրողների հետ ճեպազրույցում ասաց Առողջապահության նախարար Արսեն Թորոսյանը՝ ի պատասխան այն հարցի, թե կորոնավիրուսով նոր հիվանդներին ինչո՞ւ ի սկզբանե չեն մեկուսացրել, այլ մեկուսացրել են տնային այցերի միջոցով հետևելուց և գանգատներից հետո միայն:

Ըստ նախարարի՝ ցուցումներում փոփոխություն է արվել: Եթե մինչ այժմ մեկուսացնում էին հիվանդից 2 շարք առաջ ու հետ նստած ուղևորներին, ապա հիմա 1 շարքն է խորհուրդ տրվում: Հիվանդների հետ շփված անձանց պարզել են, 1 դեպք կա մեծ շրջանակով, նրանք բոլորն էլ հայտնի են և նույնականացված:

«Իտալիայի քաղաքացու հետ շփված անձանց շրջանակն է մեծ, նրանք մեկուսացվել են առանձնացված մի շենքում, որտեղ ապրողներ չկան»:

Ըստ նախարարի՝ հանրաքվեի քարոզչություն չկատարելու և կրթական հաստատություններում պարապմունքները հետաձգելու վերաբերյալ որոշումներ կայացնելու հարցում դեռ շտապել պետք չէ:

«Որոշումները կայացվում են օրական ռեժիմով, հնարավոր է ցանկացած պահի այլ որոշում կայացնել: Ինչ վերաբերում է մեզ ուղղված այն քննադատությանը, թե այլ երկրներ ավելի խիստ միջոցներ են իրականացնում, երևի շատերը չգիտեն ձեռնարկված միջոցառումների մասին: Ցանկացած երկիր իրականացնում է իրավիճակին համահունչ միջոցառումներ»:

Իսկ թե ինչո՞ւ 1 դեպք լինելու պարագայում դասերի հետաձգում եղավ, 4-ի դեպքում նույնը չի արվում, Ա. Թորոսյանը նշեց. «Հանրային վստահության և հավաստիանալու համար, որ լոկալ տրանսմիսիա չի եղել, որոշվեց 5 օրանոց արձակուրդը տեղափոխել առաջ: Այսօր ունենք նոր իրավիճակ, ու որոշում կկայացվի նոր իրավիճակի վերաբերյալ: Չի բացառվում, որ հանրային հավաքների վերաբերյալ որոշում կայացվի»,- ասաց նախարարը: