Վահրամ Ավետիսյանը մանրամասնում է՝ ի՞նչ հարցեր են քննարկվել «Իմ քայլի հետ»
 42 Հինգշաբթի, 30 հուլիսի, 2020 թ., 18:30 «Շուրջ երեք ժամ ընթացած քննարկումների ժամանակ «Իմ քայլը» խմբակցության պատգամավորները հնչեցրին ինչպես սոցիալական ցանցերում, մամուլի կողմից բարձրացված հարցերը, այնպես էլ՝ այնպիսի հարցեր, որպիսիք լրատվամիջոցների կողմից չէին հնչեցվել»,- «Իմ քայլի» նիստից հետո լրագրողների հետ զրույցում ասաց Կառավարության կողմից առաջադրված ՍԴ դատավորի թեկնածու Վահրամ Ավետիսյանը: Անդրադառնալով, «Մարտի 1»-ի գործով տուժողների և նրանց իրավահաջորդների հայտնած մտահոգություններին՝ Ավետիսյանն ասաց. «Ես ամենևին չեմ պատրաստվում արդարացնել ՀՀ-ում գոյություն ունեցած դատական համակարգի առկա խնդիրները, նաև չեմ պատրաստվում դառնալ դատական համակարգի մեղքերի քավության նոխազը: Իմ հոր հետ կապված հարցադրումների մասով նշեմ, որ անհրաժեշտ է հստակ պարզել Վճռաբեկ դատարանի գործառույթը. արդյոք Վճռաբեկը գործ քննող դատարա՞ն է, թե՝ ոչ, արդյոք առկա՞ են հստակ փաստեր, թե՞ խոսում ենք միայն ենթադրությունների մասին և այլն»: ՍԴ դատավորի թեկնածուն հայտնեց, որ թեպետ հասկանում է այդ մտահոգությունները, սակայն դրանք չի կիսում: |
