«Չկա նման դեպք, երբ Պուտինը, Թրամփը և Մակրոնը ստորագրած կլինեն մի թղթի տակ»․ Էդմոն Մարուքյան

Այսօր ԱԺ նիստից հետո լրագրողների հետ ճեպազրույցում ԼՀԿ խմբակցության ղեկավար Էդմոն Մարուքյանը, անդրադառնալով պատերազմի մեկնարկից մինչ օրս դիվանագիտական հարթակների աշխատանքին, նկատեց, որ Հայաստանը կարողացել է հասնել նրան, որ միջազգային հանրության կողմից Թուրքիային ուղղված շատ խիստ հայտարարություններ են եղել։
«Միջազգային հարթակներում հնչեցվեցին հանգամանքներ՝ առ այն, որ Ադրբեջանն օգտագործում է վարձկանների, ահաբեկչական տարբեր խմբավորումների ներկայացուցիչների, որոնք գլխացավանք են դառնալու այս տարածաշրջանի համար»,- հավելեց նա։
«Թուրքիան Մինսկի խմբի երկիր է, բայց, դրանով հանդերձ, նա իրեն պահում է ոչ թե ոչ անաչառ, այլ ուղղակի որպես մի կողմի պատերազմը սնուցող երկիր։ Հիմա այդ երկիրն ուզում է դառնալ համանախագահ, ինչի՞ մասին խոսել է Ալիևը։ Դա անթույլատրելի է և ոչ մի կերպ չի կարող տեղի ունենալ։ Մինսկի խումբը պետք է պահպանել այնպես, ինչպես կա»,- շեշտեց ԼՀԿ խմբակցության ղեկավարը։
«Եվս մի կարևոր շատ հանգամանք․ վերջին տարիներին չեք գտնի շատ հայտարարություններ, որտեղ Պուտինը, Թրամփը և Մակրոնը ստորագրած կլինեն մի թղթի տակ։ Չկա հարց, որտեղ Ռուսաստանն ու Ամերիկան համատեղ մի բան կանեն»,- արձանագրեց Մարուքյանը՝ նշելով, որ դա կարևոր դիվանագիտական աշխատանքի արդյունք է։