Հայոց ցեղասպանության մասին հայտարարության պատճառով հետաքննություն է սկսվել Դիարբեքիրի փաստաբանների ասոցիացիայի դեմ

Դիարբեքիրի դատախազությունը փաստաբանների ասոցիացիայի դեմ հետաքննություն է սկսել՝ վերջինիս՝ Հայոց ցեղասպանության մասին հրապարակած հայտարարության հետ կապված։

Ասոցիացիայի նախագահն ու անդամները մեղադրվում են «թուրք ազգին, Թուրքիայի Հանրապետությանը, պետական ինստիտուտներին և մարմիններին վիրավորելու մեջ»։
Փաստաբանների ասոցիացիայի նախագահ Նահիթ Էրենը Twitter-ի իր էջում հայտարարել է. «Դիարբեքիրի փաստաբանների ասոցիացիան մինչև վերջ պայքարում է բոլորի խոսքի ազատության համար և չի պատրաստվում սահմանափակել սեփական խոսքի ազատությունը՝ ճնշումների և հետաքննության պատճառով»․
Ապրիլի 24-ին՝ Հայոց ցեղասպանության զոհերի հիշատակի օրը, փաստաբանների ասոցիացիան հայտարարություն էր հրապարակել, որում նշված է․ «Մենք կիսում ենք մեծ աղետի ցավը։ 1915 թվականի ապրիլի 24-ին սկսված հայերի տեղահանությունը սկիզբ դրեց մեր սոցիալական պատմության ամենացավոտ աղետներից մեկին։ Ահա թե ինչու ապրիլի 24-ը հայ ժողովրդի ամենամռայլ օրերից մեկն է»,- ասվում է տարածած հայտարարության մեջ։