«Տնտեսվարողները գործում են օտարերկրացիների համար․ սրճարաններում ճաշացանկը միայն օտար լեզվով է»․ Դավիթ Գյուրջինյան

«Զարմանալի բան է․ Հայաստանում մեր տնտեսվարողները կարծես թե գործում են ոչ հայաստանցիների համար, այլ ՝ զբոսաշրջիկների»,- այսօր՝ մամուլի ասուլիսի ժամանակ, ասաց Լեզվի կոմիտեի նախագահ Դավիթ Գյուրջինյանը։

«Խախտումն ակնհայտ է․ մտնում ես ճաշարան, սրճարան, և բերում են ճաշացանկը՝ միայն օտար լեզվով, այնինչ ՀՀ Լեզվի մասին օրենքն ասում է, որ նախ պիտի լինի հայերեն և կարող է զուգակցվել օտար լեզուներով։ Մեր տնտեսվարողներն այս դեպքում փորձում են ապացուցել, որ զբոսաշրջիկը հայերեն չի հասկանում, բա հայաստանցինե՞րը»,- նկատեց Գյուրջինյանը։

«Սա Հայաստանն է, այս երկրի պետական լեզուն հայարենն է»,- ընդգծեց նա։

«Կամ էլ իրենց հաստատությունների գլխին տնկում են մեծ ցուցանակներ՝ միայն օտարալեզու․․․ էլ չեմ ասում այդ անունների անճաշակ լինելու մասին։ Սա զարգացածության նշան չէ»,- հավելեց Լեզվի կոմիտեի նախագահը։