«Խառնվում են մեր ներքին կյանքին, բայց ԵՄ անդամության հարց այդպես էլ չեն քննարկում»․ Սևակ Հակոբյան

Լրագրող, խմբագիր Սևակ Հակոբյանի ֆեյսբուքյան գրառումը՝ կից տեսանյութով. «Հայաստանի և ԵԱՏՄ մյուս անդամ պետությունների միջև ապրանքաշրջանառության ծավալներն ընթացիկ տարվա 9 ամիսներին, 2022-ի համեմատ, աճել են + 51%-ով։ Աճել է գյուղմթերքի ու սնդամթերքի, կոշիկի և այլնի արտահանումը։ Մոսկվայում տեղի ունեցած Եվրասիական միջկառավարական խորհրդի նիստում Հայաստանի օգտին կայացվել է բավականին լավ որոշում․ 16 հազար քաղաքացի ազատվել է էլեկտրամոբիլների մաքսատուրքերից։
ԵԱՏՄ նիստը հաջորդել է Հայաստանի բարձր պաշտոնյաների՝ Գերմանիա, Բրյուրսել այցերին, որոնց ժամանակ Ռուսաստանին հակազդելու կոչեր են հնչել ու որոշումներ կայացվել։ Այնտեղ տրամադրում են Ռուսաստանի դեմ, այստեղ պարզվում է՝ շնորհիվ ԵԱՏՄ-ի՝ տնտեսական բարձր արդյունքներ կան։
ՌԴ փոխվարչապետ Ալեքսեյ Օվերչուկը հայտարարել է, որ ինչ-որ պահի Հայաստանը ստիպված կլինի ընտրություն կատարել Եվրոմիության և ԵԱՏՄ-ի միջև։ Նա նշել է, որ Հայաստանի և ՌԴ միջև առևտրաշրջանառությունը կիսով չափ նվազել է՝ 12,4 մլրդ դոլարից դառնալով 6 մլրդ։ Մեզ ասում են՝ ուզում եք դո՞ւրս գալ ԵԱՏՄ-ից, խնդրեմ, դուք եք որոշում, ուղղակի նայեք ինչ եք շահում ու կորցնում։ ՌԴ վարչապետ Միխայիլ Միշուստինը ասում է՝ «ԵԱՏՄ-ում հարգում են յուրաքանչյուր պետության զարգացման սեփական մոդելի իրավունքը, բոլոր մասնակիցների շահերը»։
ՀՀ կառավարության ղեկավարը բառախաղ է անում՝ Հայաստանի նպատակը ԵԱՏՄ-ից դուրս գալը չէ, այլ ԵՄ անդամ դառնալն է․ նույն բանը չէ՞։ Լավ, իսկ ի՞նչ կա եվրոպական ճամբարում։ Ամենահետաքրքիրն այստեղ է․ Եվրոմիության անդամ Չեխիայի դեսպանն ասում է՝ «ԵՄ-ին անդամակցելու օրակարգ Հայաստան-Եվրոմիություն հարաբերություններում չկա»։ Այսինքն՝ Հայաստանի հետ փոխայցեր են անում, գնում-գալիս են, պատվերներ են տալիս, խառնվում են մեր ներքին կյանքին, բայց անդամության հարց այդպես էլ չեն քննարկում»։