Թուրքիային անհանգստացրել է ԱՄՆ-ի դիվանագետների հանդիպումը Սիրիայի քրդերի առաջնորդների հետ

ԱՄՆ-ի պետքարտուղարության պատվիրակությունը Սիրիայում հանդիպել է քրդական ուժերի ներկայացուցիչների հետ:

Մերձավոր Արևելքի հարցերով պետքարտուղարի տեղակալ Իթան Գոլդրիչի գլխավորած պատվիրակության հետ հանդիպմանը ներկա են եղել Սիրիայի քրդական «Ժողովրդական ինքնապաշտպանության ջոկատների» (YPG) հրամանատար Մազլում Քոբանին և «Սիրիայի դեմոկրատական մեջլիսի» գործադիր խորհրդի նախագահ Իլհամ Ահմեդը:

Հանդիպման ընթացքում քննարկվել են հնարավոր օժանդակությանը վերաբերող հարցեր: Նշվել է, որ YPG-ի ներկայացուցիչները խնդրել են ավելացնել ռազմական և ֆինանսական աջակցությունը:
ԱՄՆ-ի պետքարտուղարության պատվիրակության հանդիպումը Սիրիայի քրդերի հետ թուրքական մամուլում մեկնաբանվել է որպես ԱՄՆ-ի կողմից հերթական հակաթուրքական քայլ, գրում է «Էրմենիհաբեր»-ը:

Նշենք, որ Թուրքիան Սիրիայի քրդական «Ժողովրդավարական միություն կուսակցությունը» (PYD) և դրա ռազմական թև համարվող «Ժողովրդական ինքնապաշտպանության ջոկատները» (YPG) համարում է ահաբեկչական կազմակերպություն և նույնականացնում է «Քուրդիստանի բանվորական կուսակցության հետ» (PKK)՝ համարելով վերջինի ճյուղավորումներից մեկը:

Հավելենք նաև, որ թուրք-ամերիկյան լարվածության հիմնական խնդիրներից մեկը Թուրքիան համարում է ԱՄՆ-ի բացահայտ աջակցությունը Սիրիայի քրդական կազմակերպություններին՝ ԱՄՆ-ին ուղղակիորեն մեղադրելով «ահաբեկչականությունը» խրախուսելու և աջակցելու մեջ: