Ուկրաինացիներին կոչ են արել սահմանափակել էլեկտրաէներգիայի օգտագործումը

Կիևը և Ուկրաինայի տեղական իշխանությունների ներկայացուցիչները սահմանափակումներ են մտցնում երկրում էլեկտրաէներգիայի օգտագործման վրա այն բանից հետո, երբ ռուսական հրթիռակոծությունը վնասել է երկրի էներգետիկ ենթակառուցվածքը։ Ուկրաինայի նախագահ Վլադիմիր Զելենսկին կոչ է արել քաղաքացիներին 17:00-22:00 կրճատել էլեկտրաէներգիայի սպառումը։

«Հակառակորդը վնասել է մեր էներգետիկ ենթակառուցվածքը, սակայն այժմ մենք անում ենք ամեն ինչ, որպեսզի շուտափույթ վերսկսվի էլեկտրամատակարարումը։ Բջջային կապ ապահովող ենթակառուցվածքը չի տուժել։ Որոշ տեղերում ընդհատումներ են եղել էլեկտրամատակարարման բացակայության պատճառով»,- իրավիճակը նկարագրել է Զելենսկին:

«Ուկրէներգո» օպերատորը նախազգուշացրել է Ուկրաինայի մայրաքաղաքի և տարածաշրջանի որոշ արդյունաբերական ձեռնարկությունների և կենցաղային սպառողների էլեկտրամատակարարման ժամանակավոր սահմանափակման մասին։ Սոցիալական ոլորտի կարևորագույն օբյեկտները՝ հիվանդանոցները, մետրոն, փրկարարական ծառայությունները և այլն, ամբողջությամբ ապահովված են էլեկտրաէներգիայով։

«Սա ամենադժվար երեկոներից մեկն է լինելու Ուկրաինայի էներգետիկ ոլորտի համար», - խոստովանել է Ուկրաինայի Գերագույն Ռադայի էներգետիկ կոմիտեի ղեկավար Անդրեյ Գերուսը։

Ռուսական բանակը հոկտեմբերի 10-ի առավոտյան հրթիռային հարվածներ է հասցրել Ուկրաինայի քաղաքներին։ Նախնական տվյալներով՝ զոհվել է 11, վիրավորվել՝ 64 մարդ։ ՌԴ ՊՆ-ն պնդում է, որ բարձր ճշգրտության հարվածներ է հասցրել «ռազմական հրամանատարության, կապի և էներգետիկայի օբյեկտներին»։