«Ադրբեջանի ցանկացած գործողություն միտված է լինելու Արցախը հայաթափելուն». Հակոբ Հակոբյան

Ինչպես հայտնել էինք, Ստեփանակերտում տեղի է ունենում «Լույս թունելի վերջում» հարթակի երրորդ քննարկումը՝ «Դեկտեմբերի 10. կամքի, կյանքի, հաղթանակի խորհուրդ» խորագրի ներքո: Քիչ առաջ ելույթ ունեցավ Արցախի «Արդարություն» կուսակցության համանախագահ Հակոբ Հակոբյանը՝ նշելով, որ Արցախում ապրողների համար պարզ է, որ ցանկացած ժամանակ կարող է սկսվել ռազմական լայնածավալ գործողություն. «Իհարկե, նաև հասկանում ենք, որ սահմանային էսկալացիա, դիվերսիոն որևիցե գործողություններ դեռևս չեն նշանակում, որ հենց էդ պահին սկսվեցին լայնածավալ գործողություններ: Մեզ համար պարզ է, որ Ադրբեջանի իշխանություններն անելու են ամեն ինչ, որպեսզի Արցախի Հանրապետությունում ապրող հայ բնակիչները գտնվեն բարոյահոգեբանական ամենաստորին մակարդակի վրա, կորցնեն դիմադրողականությունն ու լքեն Արցախը: Իրենց ցանկացած գործողություն միտված է լինելու Արցախը հայաթափելուն»: