Մետաղական տանիքներ, եվրոդռներ ու պատուհաններ արտադրող «Սթիլ Կոնցեռն» ՍՊԸ-ն ազատվեց մաքսատուրքից

Կառավարությունն իր այսօրվա՝ դեկտեմբերի 22-ի նիստում որոշեց գերակա ոլորտում իրականացվող ներդրումային ծրագրի շրջանակներում մաքսատուրքից ազատել «ՍԹԻԼ ԿՈՆՑԵՌՆ» ՍՊԸ-ին:

Որոշման հիմնավորման մեջ նշվում է, որ ներմուծվող հումքը և սարքավորումները նախատեսվում են օգտագործել ցինկապատ մետաղական տանիքի ծածկերի, ջրահեռացման համակարգերի և համալրող այլ աքսեսուարների, եվրոդռների և պատուհանների, ինչպես նաև պրոֆիլների արտադրության համար։

Արտադրությունն իրականացվելու է ք․ Հրազդանում։ Ընկերությունը հիմնադրվել է 2013 թվականին։ Թողարկված արտադրանքը նախատեսվում է արտահանել ՌԴ։

Ծրագրի շրջանակներում նախատեսվում է իրականացնել 32 մլրդ դրամի ներդրում սարքավորումների ձեռքբերման և 974 մլն դրամի ներդրում հումքի ձեռքբերման համար։

Նախատեսվում է ներդրումային ծրագրի շրջանակներում ստեղծել 6 նոր աշխատատեղ՝ մինչև 200 հազ դրամ միջին ամսական աշխատավարձով։

Արտոնություն ստանալու համար ներկայացված ապրանքների արժեքը կազմում է32․4 մլրդ դրամ: Մաքսատուրքից ազատման արտոնությունը գնահատվում է 1․6 մլրդ դրամ: