«Ամենավտանգավորը Բլինքենի հայտարարությունն էր». Արմեն Բաղդասարյան

«Պրեսսինգ» հաղորդաշարի եթերում քաղաքագետ, հրապարակախոս Արմեն Բաղդասարյանն անդրադարձել է Վաշինգթոնում տեղի ունեցած հայ-ադրբեջանական բանակցություններին: «Երբ ասվում է՝ զգալի առաջընթաց է արձանագրվել ու երբ Փաշինյանը միաժամանակ հայտարարում է, որ ամեն անգամ, երբ դժվար բանակցությունների ընթացքում հասնում ենք ինչ-որ հաջողության, Ադրբեջանը նույն պահին նոր բաներ է պահանջում, սա նշանակում է, որ իրականում մեր դիրքորոշումն է մոտենում, Ադրբեջանն ընդառաջ քայլ չի անում: Այսինքն, տվյալ դեպքում առաջընթաց նշանակում է՝ ՀՀ-ն համաձայնել է լրացուցիչ զիջումների»: Ի՞նչ զիջումների կարող էր համաձայնել Հայաստանը. հարցադրում է հնչեցնում բանախոսն ու տալիս հետևյալ պատասխանը. «Վերջնականապես հրաժարում Արցախից, անկլավների հանձնում, միջանցք՝ ինչ-որ ձևակերպմամբ»: Բաղդասարյանի խոսքով՝ ամենավտանգավորը ԱՄՆ պետքարտուղար Բլինքենի հայտարարությունն էր, որտեղ նա խոսում էր Հայաստանի և Ադրբեջանի միջև միասնական անվտանգային համակարգ ստեղծելու մասին. «Բլինքենն ակնհայտորեն նկատի է առնում Հայաստան, Ադրբեջան, Թուրքիա դաշինքը՝ ընդդեմ Ռուսաստան, Իրան դաշինքի»,- նշել է նա՝ հավելելով, որ Ադրբեջանը չի համաձայնել, քանի որ իրեն այդպիսի դաշինք պետք չէ: