«Ադրբեջանական կողմը հստակ քայլերով փորձում է երկու խնդիր լուծել». Արա Պողոսյան

Քաղաքագետ Արա Պողոսյանի ֆեյսբուքյան գրառումը. «Ինչպես կանխատեսելի էր, Լաչինի միջանցքը բացելու հավանականությունն այս պահին գրեթե զրոյական է, իսկ Աղդամից հումանիտար բեռի մուտքը իր հերթին դառնում է անիրատեսական, ընդ որում՝ ադրբեջանական կողմը հստակ քայլերով փորձում է երկու խնդիր լուծել՝ ուժասպառ անել «պաշարված ամրոցի պահապաններին», վերջնականապես ոչնչացնել ռուսական ազդեցությունը և հիմքեր նախապատրաստել 2025 թվականին (իսկ ես կարծում եմ ավելի շուտ), ռուսական խաղաղապահ ուժերի դուրսբերման համար, որը ներկա զարգացման տրամաբանության մեջ դառնում է անխուսափելի։
Ադրբեջանի և իր հովանավորների կողմից նաև նախապատրաստական լուրջ աշխատանք էր նախորդիվ կատարվել, որպեսզի ապալեգիտիմացվի Արցախի Հանրապետության նախագահի ընտրությունը։ Ցավոք, այս հարցում թշնամուն ձայնակցում են նաև տեղական անհատներ և ուժեր, ինչն իր հերթին սեղմում է օղակը Արցախի շուրջ։ Ընդ որում, անկախ այն հանգամանքից, թե մենք ինչ կարծիք ունենք նորընտիր նախագահի մասին, մենք ստիպված ենք պաշտպանել նրա լեգիտիմությունը և ամեն ինչ անել, որպեսզի նա ծառայի Արցախի Հանրապետության և Արցախի ժողովրդի հիմնարար շահերին»։