«Եվրոպայում միջանցք ասում են` հասկանալով տրանսպորտային հաղորդակցությունը». Նիկոլ Փաշինյան

«Մեզ համար անընդունելի է ու կարմիր գիծ Հայաստանի Հանրապետության ինքնիշխանությունը կասկածի տակ դնող ցանկացած հայտարարություն: Բայց ես նաև ուզում եմ վերահաստատել, որ 2020 թվականի նոյեմբերի 9-ի եռակողմ հայտարարության միակ կետ՝ սուվերենության որոշակի սահմանափակմամբ, նախատեսված է միայն Լաչինի միջանցքը: Հայաստանի Հանրապետության տարածքով միջանցք նախատեսված չէ: Այստեղ շատ կարևոր է, որ մենք միջազգային հանրության ականջին շփոթ չստեղծենք: Օրինակ՝ Եվրոպայում միջանցք ասում են՝ հասկանալով տրանսպորտային հաղորդակցությունը: Շատ դեպքերում, օրինակ, Ադրբեջանի որոշ շրջանակներ օգտագործում են սխալ կոնտեքստներ՝ Հայաստանի տարածքային ամբողջականության հանդեպ նկրտումներ ունենալով: Դա մեզ համար կարմիր գիծ է»,- այսօր ԱԺ-ում հայտարարեց վարչապետ Նիկոլ Փաշինյանը: Մի գաղտնիք ասեմ՝ հենց Հայաստանի ներսում կառուցվում է «Հյուսիս-հարավ ճանապարհային միջանցք» ծրագիր: Եվ մենք կոմունիկացիոն խնդիրներ ունենք ինքներս մեր հետ և միջազգային հանրության հետ: Եվ Ադրբեջանի որոշ շրջանակներ սա օգտագործում են Հայաստանի դիրքորոշումն ապակառուցողական որակելու համար:

«Մենք դեմ չենք, որ մեր տարածքով անցնեն տարածաշրջանային գազամուղեր, նավթամուղեր, էլեկտրական հաղորդման գծեր, մենք, ընդհակառակը, շահագրգռված և հետաքրքրված ենք այդ ծրագրերով, և այս ամենը պետք է տեղի ունենա ՀՀ ինքնիշխանության և իրավազորության սահմաններում, ինչպես նաև մյուս երկրների ինքնիշխանության իրավազորության և սահմաններում»։