«Զոհաբերեցիք Արցախը հանուն ՀՀ-ի, ապահովեցի՞ք ՀՀ տարածքային ամբողջականությունը». Աննա Գրիգորյանը՝ Փաշինյանին

Կառավարության հետ հարցուպատասխանի ժամանակ «Հայաստան» խմբակցության պատգամավոր Աննա Գրիգորյանը ՀՀ վարչապետ Նիկոլ Փաշինյանին մի շարք հարցադրումներ ներկայացրեց
«2022 թվականին Պրահայում ընդունեցիք մի հայտարարություն, որով ոչ միայն իջեցրեցիք Արցախի կարգավիճակի նշաձողը, այլ ուղղակի ոչնչացրեցիք այն: Այսօր խոսում եք նրա մասին, որ պարտավորված եք եղել ՀՀ տարածքային ամբողջականությունը պահելու համար այդ հայտարարությունը ստորագրել կամ ճանաչել Արցախն Ադրբեջանի կազմում։ Հիմա հարց է առաջանում՝ ապահովեցի՞ք ՀՀ տարածքային ամբողջականությունը, կասեցրեցիք բոլոր այն հնարավոր սպառնալիքները, որոնք որ այսօր գոյացած են ՀՀ-ի առջև, պատասխանը «ոչ»-ն է։ Միջազգային կոնսոլիդացիայի փոխարեն մենք այսոր ստացել ենք միջազգային մեկուսացում:

Ի՞նչ եք անում, որպեսզի թույլ չտաք հնարավոր նոր էսկալացիա, ի՞նչ եք բանակցել, ի՞նչ եք խոստացել, որ Ադրբեջանն ուզում է ուժի սպառնալիքով ստանալ:

Ի պատասխանն Փաշինյանն ասաց. «Ադրբեջանն ուժի սպառնալիքով ուզում է ստանալ այն, ինչը դուք եք խոստացել»,- ի պատասխան ասաց Փաշինյանը։

«Ես եմ խոստացե՞լ»,- տեղից արձագանքեց ընդդիմադիր պատգամավորը։

«Եթե դուք կապ չունեք այստեղ նստած մարդկանց հետ, ուրեմն, Դուք չեք խոստացել։ Ադրբեջանն ուզում է ստանալ այն, ինչը որ դուք 1999 թվականին պայմանավորվել եք։ Դա է ուզում ստանալ։ Ադրբեջանն ուզում է ստանալ այն, ինչը դուք ավելի ուշ էլ եք պայմանավորվել։ Ադրբեջանն ուզում է ստանալ այն, երբ Սերժ Սարգսյանը հայտարարում էր, որ «մենք համաձայնվել ենք դուրս գալ 7 շրջաններից, բայց ամեն անգամ Ադրբեջանը նորանոր պահանջներ էր առաջադրում։ Այ, դա է ուզում ստանալ»,- ասաց կառավարության ղեկավարը։

Ինչ վերաբում է խոստումներին, ապա Փաշինյանն ասաց, որ դրանց մասին հրապարակային հայտարարել է, և ավելին չի խոստացել։