Ուկրաինան Արայիկ Հարությունյանին մեղադրում է իր ամբողջականության նկատմամբ ոտնձգությունների համար

Ուկրաինական հայտնի «Միրոտվորեց» հարթակում ընդգրկվել է Արցախի Հանրապետության նախկին նախագահ Արայիկ Հարությունյանի անունը։ Հարթակը, որն Ուկրաինայում հռչակված է որպես «Ուկրաինայի ազգային անվտանգության դեմ ուղղված հանցագործությունների ուսումնասիրության կենտրոնի ինտերնետային ներկայացուցչություն», հրապարակում է անձանց տվյալներ, որոնց Ուկրաինան մեղադրում է իր դեմ գործողություններ իրականացնելու համար։

Արայիկ Հարությունյանին հարթակում ներկայացնում են՝ որպես «Լեռնային Ղարաբաղի չճանաչված Հանրապետության պուտինամետ կեղծ նախագահ», ով պաշտոնավարել է 2020-23 թվականներին, մեղադրում են ռուսական քաղաքական կուրսին աջակցելու, Դոնեցկի և Լուգանսկի Ժողովրդական Հանրապետությունները Ռուսաստանի կազմում ընդգրկելու փաստը ողջունելու մեջ։

«Միրոտվորեց» հարթակն իր հրապարակումը համարում է «հանցագործության մասին հաղորդում» և Ուկրաինայի իրավապահ մարմիններին հորդորում հետամուտ լինել հրապարակման մեջ նշված փաստերին։

Հարթակը հղումներ է անում նաև Արայիկ Հարությունյանի նախկին մի շարք գրառումներին, որոնք, իբրև թե, ոտնձգություն են Ուկրաինայի ամբողջականության նկատմամբ: