Զելենսկին հերքել է ենթադրությունները, որ Ուկրաինան կարող է պարտվել. #BBC

926

Չորեքշաբթի, 20 դեկտեմբերի, 2023 թ., 12:00

Ուկրաինայի նախագահ Վլադիմիր Զելենսկին տարեվերջյան ամփոփիչ ասուլիս է տվել: BBC-ն ներկայացրել է ասուլիսի ժամանակ Զելենսկու գլխավոր հայտարարությունները:

Ուկրաինայի նախագահը հայտարարել է, որ Ռուսաստանին չի հաջողվել պատերազմում «որևէ հաղթանակի» հասնել և հերքել է այն ենթադրությունները, որ Ուկրաինան կարող է պարտվել:

Զելենսկին վստահություն է հայտնել, որ ԱՄՆ-ը մոտ ապագայում կկարողանա Կիևին լրացուցիչ ռազմական օգնություն տրամադրել:

«Պատերազմ, հաղթանակ, լճացում՝ կախված է բազմաթիվ որոշումներից, շատ ուղղություններից, բայց մեծամասամբ՝ մեզնից: Եթե մենք չկորցնենք մեր տոկունությունը, ավելի շուտ կավարտենք պատերազմը»,- ասել է Զելենսկին:

Զելենսկին հայտարարել է, որ ուկրաինացի զինվորականներն իրեն խնդրել են մոբիլիզացնել 450-500 հազար մարդու, բայց նա առաջարկել է նրանց լրամշակել ծրագիրը:
Նա նաև հայտնել է, որ մտադիր չէ ստորագրել զորահավաքի մասին օրենքը, որը ենթադրում է Ուկրաինայի զինված ուժերի շարքերում կանանց ներգրավում, սակայն կարող է որոշակի պայմաններում համաձայնել 25 տարեկանից բարձր ուկրաինացիների զորահավաքին:

Նախագահը դժկամությամբ է մեկնաբանել իրավիճակը ռազմաճակատում և ռազմական հրամանատարության հետ հարաբերությունները. մի քանի անգամ խուսափել է ուղիղ պատասխանից, թե արդյո՞ք մտադիր է աշխատանքից ազատել Ուկրաինայի զինված ուժերի գլխավոր հրամանատար Վալերի Զալուժնուն:

Արդյունքում Զելենսկին նրան անվանել է իր թիմի անդամ և ընդգծել, որ նրանից ակնկալում է կոնկրետ արդյունքներ և աշխատանք՝ ի շահ Ուկրաինայի:

Ասուլիսի ընթացքում Զելենսկուն հարցրել են՝ արդյոք Ուկրաինան կարո՞ղ է փոխել իր ռազմավարությունը՝ հակահարձակման անհաջող արդյունքներից հետո. «Ռազմավարությունը չի կարելի փոխել մեր Սահմանադրությամբ, դա մեր տարածքն է»,- ասել է նա:

Ռազմական ղեկավարության փոփոխության մասին հարցին Զելենսկին չի պատասխանել: