«Պուտինը չի ցանկանում ոչ սառեցված հակամարտություն, ոչ էլ խաղաղություն». Կիև

Ուկրաինայի արտաքին գործերի նախարար Դմիտրի Կուլեբան իսպանական El Pais թերթին տված հարցազրույցում հայտարարել է, որ Ռուսաստանի նախագահ Վլադիմիր Պուտինը «չի ցանկանում սառեցված հակամարտություն կամ խաղաղություն»։ «Նրանք, ովքեր առաջարկում են սառեցված հակամարտություն, պնդում են, որ գործում են Ուկրաինայի և աշխարհի լավագույն շահերից ելնելով, բայց իրականում նրանք օգնում են Պուտինին»,- ասել է նախարարը։

Կուլեբան նշել է, որ 2014-2022 թվականներին Ուկրաինան բանակցությունների գրեթե 200 փուլ է անցկացրել Ռուսաստանի հետ, երբ հակամարտությունը դե ֆակտո սառեցված էր. «Մենք փորձեցինք։ Մենք հաստատեցինք և 20 անգամ հայտարարեցինք հաշտության մասին, բայց անվերջ բանակցություններն ավարտվեցին Պուտինի լայնամասշտաբ ներխուժմամբ»։

Նա կարծում է, որ Ուկրաինան պետք է հաղթի, իսկ Ռուսաստանը՝ պարտվի, ինչը նշանակում է, որ «ողջ քաղաքական մտածողությունը» պետք է ուղղված լինի այդ նպատակին։