Ուրբաթ, 12 ապրիլի, 2024 թ.
|
Ստեփանակերտում`   +14 °C

«Հայ-ֆրանսիական հարաբերությունների խորացումը չի՞ հակադրվում Հայաստան-Ռուսաստան պարտավորություններին». լրագրողը՝ նախարարին

«Հայ-ֆրանսիական հարաբերությունների խորացումը չի՞ հակադրվում Հայաստան-Ռուսաստան պարտավորություններին». լրագրողը՝ նախարարին
184
Ուրբաթ, 23 փետրվարի, 2024 թ., 13:18

Հայ-ֆրանսիական հարաբերությունների խորացումը չի՞ հակադրվում արդյոք Հայաստան-Ռուսաստան մեր պարտավորություններին, ՀԱՊԿ շրջանակում մեր հարաբերություններին։ Եվ ինչպե՞ս է հայ-ֆրանսիական համագործակցությանը վերաբերվում Իրանը։ Այս հարցերին մամուլի ասուլիսի ժամանակ պատասխանել է ՀՀ պաշտպանության նախարար Սուրեն Պապիկյանի․ «Երբ խոսում ենք պարտավորությունների մասին, այն պետք է դիտարկենք երկուստեք: Ես պատահական չանդրադարձա 2022թ. սեպտեմբերի իրադարձություններին, երբ ՀՀ սուվերեն տարածքը ենթարկվեց ագրեսիայի: Այդ դեպքերից հետո է, որ Հայաստանն իր ռազմատեխնիկական համագործակոթյունը դիվերսիֆիկացնելու խնդիր դրեց։ Հայաստանի սուվերեն իրավունքն է և Հայաստանի Հանրապետությունը իրավասու է որոշել՝ ո՞ւմ հետ և ի՞նչ աստիճանի համագործակցություն ունենալ։ Սա բխում է Հայաստանի ժողովրդի և պետականության շահերից, մենք այս հարցում շատ հստակ ենք, պարզ և անթաքույց։ Ինչ վերաբերում է մեր հարևաններին, բարեկամներին, դաշնակիցներին, տարբեր կենտրոններին՝ կարող եմ ասել, որ հայ-ֆրանսիական համագործակցությունը հանուն Հայաստանի Հանրապետության է և որևէ մեկի դեմ չէ։ Կարծում եմ՝ մեր իրավունքն է համագործակցել և՛ Ֆրանսիայի, և՛ Իրանի հետ, և դա ի գիտություն պետք է լինի բոլորին։ Մեր ֆրանսիացի գործընկերները հարգում են մեր համագործակցությունն այլ գործընկերների հետ, մեր իրանցի գործընկերները հարգում են մեր համագործակցությունն այլ երկրների հետ, կարծում եմ՝ նույնը մեր ռուսաստանցի գործընկերները պետք է անեն»,- ասել է Պապիկյանը։