«2020-ին Մյունխենում հրապարակված սկզբունքներն ու Փաշինյան-Ալիև «պատմական» բանավեճը»․ Թաթուլ Հակոբյանի անդրադարձը

Լրագրող Թաթուլ Հակոբյանի ֆեյսբուքյան գրառումը․ «Երբ կարդում, լսում կամ դիտում եմ այսօրվա իշխանությունների արդարացումները, թե ինչու ենք կորցրել Արցախը կամ ինչու է Ադրբեջանը ստորացնում մեզ (Արմեն Գրիգորյանն ասում է՝ Ռուսաստանն է Արցախը վերցրել-տվել Ադրբեջանին, Նիկոլ Փաշինյանն ասում է՝ 30 տարի մենք Ադրբեջանին օր ու արև չենք տվել, հիմա էլ նրանք չեն մեզ օր ու արև տալիս), հիշողությանս մեջ վերականգնվում են նույն իշխանությունների անպատասխանատու հայտարարությունները:
Այսօր հիշեցի Նիկոլ Փաշինյանի՝ 2020թ. փետրվարին Մյունխենում հրապարակված սկզբունքները, որով պետք է կարգավորվեր Արցախյան հակամարտությունը:
Առանց մեկնաբանության՝ այստեղ թողնում եմ այդ 6 սկզբունքները, իսկ ստորև՝ Փաշինյան-Ալիև ցածրամակարդակ, «պատմական» բանավեճը:
1. Լեռնային Ղարաբաղը անկախություն է ստացել այնպես, ինչպես Ադրբեջանը:
2. Լեռնային Ղարաբաղը կոնֆլիկտի և բանակցային կողմ է, առանց որի հետ բանակցելու հնարավոր չէ լուծել կոնֆլիկտը:
3. Չկան տարածքներ, կա անվտանգություն. Լեռնային Ղարաբաղը չի կարող զիջել իր անվտանգությունը:
4. Հնարավոր չէ կոնֆլիկտը լուծել մեկ կամ երկու գործողությամբ. բանակցային գործընթացում անհրաժեշտ են «միկրո հեղափոխություններ», ապա «մինի հեղափոխություններ», ապա ճեղքում:
5. Հարցի որևէ լուծում պետք է ընդունելի լինի Հայաստանի ժողովրդի համար, Ղարաբաղի ժողովրդի համար, Ադրբեջանի ժողովրդի համար և Հայաստանն ու Ղարաբաղը պատրաստ են լրջագույն ջանքեր գործադրել նման լուծում գտնելու համար: Այսպիսի պատրաստակամություն պիտի ցուցաբերի նաև Ադրբեջանը:
6. ԼՂ հարցը չունի ռազմական լուծում: Եթե որևէ մեկը կասի, որ հարցը ռազմական լուծում ունի, Ղարաբաղի ժողովուրդը կասի՝ ուրեմն այն վաղուց լուծված է»։