«Իրենք ողջ են, գերի են ընկել»․ արցախցին՝ Ստեփանակերտի բենզալցակայանի պայթյունից հետո անհետ կորածների մասին

«2023 թվականի սեպտեմբերի 23-ին Ստեփանակերտի մոտ բենզինի պահեստի պայթյունից հետո ունենք 21 անհետ կորած։ Դիմել ենք տարբեր կազմակերպություններ, ՄԱԿ, ԵՄ, Հայաստանի ՄԻՊ-ին, Արցախի իշխանություններին, Հյաստանում ՌԴ դեսպանությանը, Հայաստանի կառավարությանը, ոչ մի տեղից պատասխան չեն տվել, կարծես ոչ ոք չի ուզում զբաղվել այդ հարցով, բոլորի համար միևնույն է, որ կան անհետ կորածներ»,- լրագրողների հետ զրույցում ասաց անհետ կորածի կինը։ Նա և Արցախում հուղարկավորված զոհերի հարազատները կառավարության շենքի մոտ բողոքի ակցիա են իրականացնում:

«21 անհետ կորածների հարազատները ԴՆԹ թեստ են հանձնել, որևէ համընկնում չի եղել, պայթյունի տարածքում ևս որևէ մասունք չի եղել։ Կարող ենք հետևություն անել, որ նրանք ողջ են։ Շատ մարդիկ են տեսել, թե ինչպես են ադրբեջանցի զինծառայողները մարդիկ տարել տեղանքից։ Ասում են, տեսել են՝ վիրավորներին տարել են ռուսական բազայի տարածք բուժելու նպատակով, հետո մեծ մեքենաներով նրանց տարել են։ Վստահ ենք՝ իրենք կան, ողջ են, սպասում ենք, որ թեկուզ մեկ ամսից, մեկ տարուց վերադառնան, թեկուզ մեկ ոտքով կամ մեկ ձեռքով»,- ասաց արցախցի կինը։